कर्नाटक विधानसभा पोटनिवडणुकीच्या प्रचाराची सांगता; १५ जागांसाठी गुरूवारी मतदान

कर्नाटकात १५ जागांसाठी होणाऱ्या विधानसभा पोटनिवडणुकीसाठी गुरूवारी सकाळी ७ वाजेपासून ते सायंकाळी ६ वाजेपर्यंत मतदान घेण्यात येईल. या मतदानाची मतमोजणी ९ डिसेंबर रोजी होणार आहे.

बंगळूर- कर्नाटकात १५ जागांसाठी होणाऱ्या विधानसभा पोटनिवडणुकीच्या प्रचार तोफा मंगळवारी थंडावल्या. गुरूवारी होणाऱ्या मतदानासाठी सत्ताधारी भाजप तसेच काँग्रेस व जनता दल (सेक्युलर) यांची प्रतिष्ठा पणाला लागली आहे. काँग्रेस व जनता दलाच्या १५ आमदारांनी बंडखोरी केल्यामुळे मध्यावधी निवडणुका घेण्याची वेळ राज्यात आली होती.

निवडणूक अधिकाऱ्याने सांगितले कि,सर्वच १५ विधानसभा मतदारसंघात मंगळवारी या १३ दिवसांच्या प्रचाराची सांगता झाली. गुरूवारी सकाळी ७ वाजल्यापासून सायंकाळी ६ वाजेपर्यंत मतदान प्रक्रिया घेण्यात येईल. या मतदानाची मतमोजणी ९ डिसेंबर रोजी घेण्यात येईल. काही छोट्या-मोठ्या घटना वगळता कायदा व सुव्यवस्थेचे कोणतेही प्रश्न उपस्थित झाले नाहीत. कारण आमच्या अधिकाऱ्यांनी या आचारसंहितेचे उल्लंघन करणाऱ्यांवर करडी नजर ठेवली होती.

पुढे ते म्हणाले, आम्ही सर्वच पक्षांचे राजकीय नेते, कार्यकर्ते आणि व्यवस्थापकांना ते मतदार नसलेले भाग सोडून जाण्याचे निर्देश दिले आहेत. आणि उमेदवारांनाही पुढील ४८ तासांच्या कालावधीत लाऊडस्पीकर न वापरण्याचा सल्ला देण्यात आला आहे. असे असले तरी उमेदवार आणि त्यांचे समर्थक मात्र बुधवारी घरोघरी जाऊन प्रचार करू शकतात आणि मतदारांना गुरुवारी मत देण्याचे आवाहन करू शकतात.

या पोटनिवडणुकीवर भाजपचे राज्यातील भविष्य अवलंबून असेल. मतदारांना आकर्षित करण्यासाठी कोणत्याच राजकीय पक्षाने हयगय केली नाही. एकीकडे भाजप स्थिर सरकार चालण्यासाठी मतदान मागत आहे. तर काँग्रेस आणि जनता दलाने (सेक्युलर) सरकार पाडणाऱ्या त्या बंडखोर उमेदवारांना पराभूत करण्याची गळ घातली आहे. विशेष म्हणजे सगळे बंडखोर सत्ताधारी भाजपच्या तिकीटावर निवडणूक लढवत आहेत.