तुम्ही सीटबेल्ट लावलाय का? नागरिकांनी जाब विचारल्याने पोलिसांची घाबरगुंडी

पोलिसांनी वाहन चालवताना सीट बेल्ट लावले नसल्याचे दिसून येत होते. त्यामुळे जमलेल्या लोकांनी त्यांना जाब विचारण्यास सुरुवात केली. आक्रमक झालेल्या लोकांनी शिवीगाळ करत गाडीत शिरण्याचा प्रयत्न केला.

मुझफ्फरपूर - सुधारित मोटार वाहन कायद्याच्या विरोधात नागरिकांचा रोष आहे. या कायद्यातील अव्वाच्या-सव्वा दंडाच्या तरतुदीमुळे नागरिक संताप व्यक्त करत आहेत. बिहारच्या मुझफ्फरपूरमध्ये नागरिकांनी पोलिसांनाच नियम दाखवल्याचे दिसून आले. आक्रमक झालेल्या लोकांमुळे पोलिसांना गाडीचे दार बंद करून बसावे लागले.

पोलिसांनी वाहन चालवताना सीट बेल्ट लावले नसल्याचे दिसून येत होते. त्यामुळे जमलेल्या लोकांनी त्यांना जाब विचारण्यास सुरुवात केली. आक्रमक झालेल्या लोकांनी शिवीगाळ करत गाडीत शिरण्याचा प्रयत्न केला. पोलिसांनी दार बंद करून घेत, घटनास्थळावरून काढता पाय घेतला. आम्हाला नियम सांगता आणि तुम्ही काय करता, असा जाब नागरिक पोलिसांना विचारत होते.केंद्र सरकारने मोटार वाहन कायद्यात सुधारणा केल्या असून नव्या सुधारणांसह मोटार वाहन कायदा एक सप्टेंबरपासून लागू करण्यात आला आहे. यातील दंडाची रक्कम मोठी असल्याने या कायद्याविरोधात जनतेचा उद्रेक पहायला मिळत आहे. त्यामुळेच अनेक राज्य सरकारांनी या कायद्याची अद्याप अंमलबजावणी केलेली नाही.