अमरावती - अनेक दिवसांपासून लागू असलेला लॉकडाऊन आता अनलॉक व्हायला सुरुवात झाली आहे. अनलॉक 1.0 मध्ये आंध्रप्रदेश सरकार कोरोनाचा जास्त फैलाव झालेल्या राज्यांतील प्रवाशांवरून सावध पवित्रा घेत आहे. या राज्यातून येणाऱ्या प्रवाशांबाबत जास्त सतर्क राहण्याचे आदेश राज्य सरकारने अधिकाऱ्यांना दिले आहेत.
कोरोनाचा कमी प्रसार झालेल्या राज्यांतून येणाऱ्या प्रवाशांना होम क्वारंटाईन होण्याचे आदेश देण्यात येणार आहेत. तर अती फैलाव झालेल्या राज्यातील प्रवाशांना इन्स्टिट्युशनल क्वारंटाईन म्हणजेच सरकार निर्देशित ठिकाणी ठेवण्यात येणार आहे, अशी माहिती राज्याचे पोलीस महासंचालक डी. जी. सवांग यांनी सांगितले. त्यानंतर कोरोना पॉझिटिव्ह आढळून आल्यानंतर प्रवाशाला रुग्णालयात भरती करण्यात येईल. आणि जर कोरोना चाचणी निगेटिव्ह आली तर त्यानंतर आणखी 7 दिवस घरीच विलगीकरणात राहण्याचे सांगण्यात येईल, असेही ते म्हणाले.