नवी दिल्ली :राष्ट्रीय सुरक्षा सल्लागार अजित डोवाल यांनी चीनचे परराष्ट्र मंत्री वांग यी यांच्यासोबत चर्चा केली. यामध्ये त्यांनी भारत-चीन सीमा तणावाबाबत बोलणी केल्याचे सूत्रांनी सांगितले आहे. व्हिडिओ कॉलमार्फत ही चर्चा पार पडली.
सीमा भागामध्ये शांतता राखण्यासाठी, आणि गलवानमध्ये झालेल्या प्रकाराची पुनरावृत्ती न होऊ देण्याबाबत या दोघांमध्ये चर्चा झाल्याचे सूत्रांनी सांगितले.
दरम्यान, गलवान खोऱ्यात भारत-चीन सीमेवरील तणावानंतर आता चीन लष्काराने एलएसीवरून(प्रत्यक्ष सीमा रेषेवरून) त्याचे तंबू हटवले आहेत. त्यांची वाहनेही सीमारेषेपासून 1 ते 2 किलोमीटर मागे घेतली असल्याची माहिती भारतीय लष्करांच्या सूत्रांकडून देण्यात आली आहे. चिनी लष्कराची काही अवजड वाहने अद्यापही गलवान नदीच्या खोऱ्यातच आहेत. मात्र, भारतीय लष्कर त्यांच्या हालचालींवर लक्ष ठेऊन आहेत.
