राजस्थानात बस-व्हॅनचा भीषण अपघात, ८ जणांचा मृत्यू

राजस्थानातील राष्ट्रीय महामार्ग ११ वर भीषण अपघात झाला. खासगी बस आणि मारूती व्हॅनची समोरासमोर धडक झाल्याने आठ जणांचा जागीच मृत्यू झाला.

जयपूर - राजस्थानामध्ये राष्ट्रीय महामार्ग ११ वर भीषण अपघात झाला. खासगी बस आणि मारूती व्हॅनची समोरासमोर धडक झाल्याने आठ जणांचा जागीच मृत्यू झाला. मृत सर्वजण राजस्थानातील बिकानेर येथील रहिवासी होते.

ओव्हरटेक करत असताना अपघात झाल्याची माहिती पोलिसांनी दिली आहे. राजलदेसर आणि परसनेऊ गावांच्या दरम्यान हा अपघात झाला. अपघाताची माहिती मिळताच राजलदेसर पोलीस घटनास्थळी पोहोचले. सर्व मृतदेह बाहेर काढून शवविच्छेदनासाठी पाठवण्यात आले आहेत. धडक इतकी जोरदार होती की, मारूती व्हॅनचा चेंदामेंदा झाला आहे. बसमधील प्रवासीही जखमी झाले असून त्यांना रुग्णालयात दाखल करण्यात आले आहे. चुरू जिल्ह्याचे पोलीस अधीक्षक तेजस्विनी गौतम, बिकानेरचे पोलीस अधीक्षक प्रदीप मोहन, जिल्हाधिकारी संदेश नायक घटनास्थळी आले होते. पोलिसांनी मोबाईलवरून संपर्क साधून कुटुंबीयांना घटनेची माहिती दिली. ही अत्यंत वाईट घटना आहे. बसचालकाच्या बेपर्वाईमुळे अपघात झाल्यामुळे बस मालक आणि चालकाविरोधात गुन्हा दाखल केला जाईल, असे चुरू जिल्ह्याचे अधीक्षक तेजस्विनी गौतम यांनी सांगितले.