आसाम : आरटीआय कार्यकर्त्याने रचला इतिहास; तुरुंगात राहून जिंकली निवडणूक

तुरुंगात राहिल्यामुळे त्यांना आपला कसलाच प्रचार करता आला नव्हता, हे वेगळं सांगायला नको. विशेष म्हणजे, त्यांच्याविरुद्ध उभ्या राहिलेल्या सुरभी राजकोनवारी यांच्या प्रचारासाठी पंतप्रधान मोदींनी सभा घेतली होती. तरीही याठिकाणी गोगोई यांचा विजय झाला.

गुवाहाटी : शेतकरी नेते आणि आरटीआय कार्यकर्ते अखिल गोगोई यांनी आसाममध्ये इतिहास रचला आहे. तुरुंगात राहूनही निवडणूक जिंकणारे ते आसाममधील पहिले व्यक्ती ठरले आहेत. शिवसागर मतदारसंघातून काँग्रेस आणि भाजपाच्या उमेदवाराला हरवून त्यांनी विजय मिळवला आहे.

तुरुंगात राहिल्यामुळे त्यांना आपला कसलाच प्रचार करता आला नव्हता, हे वेगळं सांगायला नको. विशेष म्हणजे, त्यांच्याविरुद्ध उभ्या राहिलेल्या सुरभी राजकोनवारी यांच्या प्रचारासाठी पंतप्रधान मोदींनी सभा घेतली होती. तरीही याठिकाणी गोगोई यांचा विजय झाला.

मोठ्या फरकाने मिळवला विजय..

अखिल यांनी काँग्रेसच्या सुब्रमित्र गोगोई यांचाही पराभव केला. याठिकाणी २०१६ साली काँग्रेसचे प्रणबकुमार गोगोई आणि भाजपाच्या सुरभी यांच्यात मुख्य लढत झाली होती. यात काँग्रेसचा विजय झाला होता. यावर्षीच्या निवडणुकीमध्ये शेतकरी नेते अखिल गोगोईंना ५७ हजार १७३ मतं मिळाली. तर सुरभी आणि सुब्रमित्र यांना अनुक्रमे ४५,३९४ आणि १९,३२३ मतांवर समाधान मानावे लागले.

२०१९मध्ये झाली होती अटक..

२०१९च्या डिसेंबरमध्ये सीएए कायद्याविरोधात आंदोलन करत असताना गोगोई यांना अटक करण्यात आली होती. तेव्हापासून ते तुरुंगात होते. त्यानंतर तुरुंगामध्येच कोरोनाची लागण झाल्यामुळे त्यांना गुवाहाटी वैद्यकीय महाविद्यालय आणि रुग्णालयाच्या विशेष सेलमध्ये हलवण्यात आले होते. त्यांना अटक करण्यात आल्यानंतर एनआयएने त्यांना आपल्या ताब्यात घेतले होते. त्यांच्यावर माओवाद्यांशी संबंध असल्याचा आरोप करण्यात आला होता. त्यादृष्टीने एनआयए तपास करत होती.

क्रिशक मुक्ती संग्राम समीती या संघटनेमधील गोगोईंच्या सहकाऱ्यांनी त्यांना निवडणुकीत लढण्याची विनंती केली. त्यांनी या निवडणुकीसाठी म्हणून 'रायजोर दल' या पक्षाची स्थापनाही केली. या पक्षाकडून गोगोई यांना तिकीट देण्यात आले. दरम्यान, शिवसागर मतदारसंघातील लोकांनी त्यांच्या विजयामुळे आनंद व्यक्त केला आहे. हा लोकशाहीचा विजय असल्याचे लोक म्हणत आहेत.

हेही वाचा :दीदींच्या भूमीत पुन्हा स्वागत असो