दिसपूर (आसाम): काँग्रेसचे प्रवक्ते पवन खेडा यांनी पंतप्रधान नरेंद्र मोदी यांच्याविरोधात केलेल्या आक्षेपार्ह वक्तव्याबाबत आसामचे मुख्यमंत्री हिमंता बिस्वा सरमा यांनी मोठे वक्तव्य केले आहे. पवन खेडा यांनी सुप्रीम कोर्टात ज्याप्रकारे आपल्या वक्तव्याबद्दल माफी मागितली आहे, त्यातून येणाऱ्या काळात हा मोठा धडा असेल, असे ते म्हणाले. कोणीही सार्वजनिक ठिकाणी असभ्य भाषा वापरू नये. आसामच्या मुख्यमंत्र्यांनीही हे प्रकरण शेवटपर्यंत नेणार असल्याचे सांगितले.
बिस्वा काय म्हणाले:आसामचे मुख्यमंत्री हिमंता बिस्वा सरमा यांनी ट्विट केले की, 'आरोपी (काँग्रेस नेते पवन खेडा) यांनी बिनशर्त माफी मागितली आहे. सार्वजनिक ठिकाणांचे पावित्र्य जपताना यापुढे राजकीय चर्चेत कोणीही अपशब्द वापरणार नाही, अशी अपेक्षा आहे. काँग्रेसचे प्रवक्ते पवन खेडा यांनी पत्रकार परिषदेत पंतप्रधान नरेंद्र मोदी यांचे नाव घेताना मोदींच्या वडिलांचे नाव गौतमदास असे घेतले होते.
खेडांवर तीन गुन्हे:पवन खेडा यांनी पंतप्रधानांचा अवमान केल्याचे भाजप नेत्यांनी सांगितले. या प्रकरणाने पेट घेतल्यावर खेडा यांच्यावर तीन गुन्हे दाखल करण्यात आले. यापैकी दोन गुन्हे उत्तर प्रदेशात तर एक गुन्हा आसाममध्ये दाखल झाला आहे. दिल्ली विमानतळावरून रायपूरला जाणार्‍या विमानात खेड्याला आसाम पोलिसांनी गुरुवारी या प्रकरणी अटक केली. या प्रकरणी चौकशीसाठी पोलिसांना त्यांना आसामला न्यायचे होते.