जयपूर : राजस्थानमध्ये कोरोना लसीकरणाबाबत सरकारचा निष्काळजीपणा दिवसेंदिवस वाढत चाललेला दिसून येत आहे. यापूर्वी लसी वाया गेल्याची घटना ताजी असतानाच आता आणखी एक धक्कादायक प्रकार समोर आला आहे. उदयपूर जिल्ह्यामध्ये एक रुग्णवाहिका चालकच नागरिकांना कोरोना प्रतिबंधक लस देताना दिसून आला आहे.
रुग्णवाहिका चालक देत होता कोरोनावरील लसीचा डोस; राजस्थानमधील धक्कादायक प्रकार
उदयपूरमधील सायरा आरोग्य केंद्रामध्ये हा प्रकार समोर आला आहे. महेंद्र लोहार नावाचा रुग्णवाहिका चालक लोकांना कोरोना प्रतिबंधक लस देत होता. लोकांच्या ही गोष्ट लक्षात आल्यानंतर त्यांनी प्रभारी वैद्यकीय अधिकाऱ्यांकडे याची तक्रार केली. यानंतर घटनास्थळी दाखल होऊन, वैद्यकीय अधिकारी राम सिंह यांनी महेंद्रला आरोग्य केंद्राबाहेर काढले. हा प्रकार गेल्या काही दिवसांपासून सुरू होता, असेही सांगण्यात येत आहे.