राजस्थान:भीषण अपघातानंतर पेटले दोन ट्रेलर, चौघांचा होरपळून मृत्यू!

राजस्थानच्या अजमेरमधील परबतपुरा बायपासवर मंगळवारी सकाळी झालेल्या भीषण अपघातात चार जणांचा होरपळून मृत्यू झाल्याची घटना समोर आली आहे. बायपासवरून जाणारे दोन ट्रेलरची समोरासमोर धडक झाल्यानंतर दोन्ही ट्रेलर्स पेटले. यावेळी आगीत होरपळून ट्रेलरमधील चौघांचा घटनास्थळीच मृत्यू झाला.

अजमेर : राजस्थानच्या अजमेरमधील परबतपुरा बायपासवर मंगळवारी सकाळी झालेल्या भीषण अपघातात चार जणांचा होरपळून मृत्यू झाल्याची घटना समोर आली आहे. बायपासवरून जाणारे दोन ट्रेलरची समोरासमोर धडक झाल्यानंतर दोन्ही ट्रेलर्स पेटले. यावेळी आगीत होरपळून ट्रेलरमधील चौघांचा घटनास्थळीच मृत्यू झाला. या दुर्घटनेत एक 15 वर्षीय मुलगा गंभीर जखमी झाला असून त्याच्यावर जेएलएन रुग्णालयात उपचार केले जात आहेत.

घटनास्थळी अग्निशमन दलाचे बंब दाखल

घटनेची माहिती मिळाल्यानंतर पोलीस आणि अग्निशमन दलाच्या बंबांनी घटनास्थळी धाव घेत आगीवर नियंत्रण मिळविले. घटनास्थळावरून चौघांचे जळालेल्या अवस्थेतील मृतदेह बाहेर काढण्यात आले. हे मृतदेह जेएलएन रुग्णालयातील शवागारात ठेवण्यात आल्याची माहिती पोलिसांनी दिली. चौघे मृत ट्रेलरचे चालक आणि क्लिनर असावे असा अंदाज अतिरिक्त पोलीस अधीक्षक सीताराम प्रजापत यांनी व्यक्त केला. मृतांपैकी दोघांची ओळख पटली असून त्यांच्या कुटुंबीयांना याची माहिती देण्यात आल्याचे ते म्हणाले. उर्वरीत दोघांची ओळख अद्याप पटली नसल्याचे त्यांनी सांगितले.

घटनेनंतर वाहतूक विस्कळीत

किशनगडवरून येणाऱ्या वेगवान ट्रेलरवरील चालकाचे नियंत्रण सुटल्याने तो रस्त्यावरील दुभाजकाला धडकून विरूद्ध दिशेच्या रस्त्यावर गेला. यावेळी समोरून येणारा ट्रेलर त्याला धडकला. यानंतर दोन्ही ट्रेलर्सनी क्षणार्धात पेट घेतला. यापैकी एका ट्रेलरमधून मार्बलची वाहतूक केली जात होती असे प्रजापत यांनी सांगितले. घटनेनंतर मार्गावरील वाहतूक काही काळ खोळबंली होती. दरम्यान पोलिसांनी नंतर क्रेनच्या सहाय्याने अपघातग्रस्त ट्रेलर्स रस्त्यावरून हटवून रस्ता वाहतुकीसाठी मोकळा करून दिला.

हेही वाचा -काबुल विमानतळावर दुर्घटना; अफगाणिस्तानातून पळण्याच्या प्रयत्नात 5 जणांचा मृत्यू