नवी दिल्ली: दिल्लीहून जाणाऱ्या काही मार्गावरील हवाई प्रवासाचे भाडे कमी झाले आहेत. या हवाई प्रवासाचे भाडे साधरण 14 ते 61 टक्क्यांनी कमी झाल्याचमी माहिती नागरी विमान वाहतूक मंत्री ज्योतिरादित्य सिंधिया यांनी दिली आहे. सिंधिया यांनी नागरी विमान वाहतूक महासंचालनालय (DGCA) आणि मंत्रालयाच्या देखरेखीच्या प्रयत्नांवर भर दिला. दिल्ली ते श्रीनगर, लेह, पुणे आणि मुंबई सारख्या ठिकाणच्या प्रवासासाठी जास्तीत-जास्त भाडे कमी केल्याबद्दल मंत्री ज्योतिरादित्य सिंधिया यांनी समाधान व्यक्त केले.
सिंधिया यांनी दिली माहिती : पत्रकार परिषदेत बोलताना सिंधिया म्हणाले की, मला हे सांगताना आनंद होत आहे की 6 जून रोजी दिल्ली ते श्रीनगर, लेह, पुणे आणि मुंबईला जोडणाऱ्या फ्लाइटचे कमाल भाडे 14-61 टक्क्यांनी कमी करण्यात आले आहे. डीजीसीए आणि मंत्रालय रोजच्या भाड्यावर लक्ष ठेवत आहेत. सोमवारी सिंधिया यांनी त्यांच्या अध्यक्षतेखाली एका उच्चस्तरीय बैठक घेतली. ही बैठक एअरलाइन्स सल्लागार गटाने बोलावली होती. या बैठकीत सिंधिया यांनी विमान कंपन्यांना हवाई भाडे स्वयं-नियमन करण्याचे आणि वाजवी दराची पातळी निश्चित राखण्याचे आवाहन केले होते. दिल्ली ते श्रीनगर, लेह, मुंबई, पुणे, अहमदाबाद आणि बंगळुरू सारख्या शहरांसाठी भाडे दर वाढले आहेत. देशांतर्गत विमान तिकिटांच्या गगनाला भिडले असल्याने ते प्रवाशांच्या अडचणीत भर घालत आहेत.