ABVP च्या विद्यार्थी नेत्यांची गोरखपूर विद्यापीठाच्या कुलगुरू कुलसचिवांना मारहाण

गोरखपूर विद्यापीठात अभाविपच्या आंदोलक विद्यार्थ्यांनी कुलगुरू आणि कुलसचिवांना मारहाण केली. विद्यार्थ्यांची पोलिसांशीही झटापट झाली. अनेक मागण्यांसाठी विद्यार्थी आंदोलन करत होते.

गोरखपूर : पंडित दीनदयाल उपाध्याय गोरखपूर विद्यापीठाच्या कुलगुरुंना आणि कुलसचिवांना अभाविपच्या विद्यार्थी नेत्यांनी मारहाण केली आहे. विद्यापीठातील विविध विभागातील भ्रष्टाचार, अराजकता आणि फी वाढीवरुन अखिल विद्यार्थी परिषदेचे विद्यार्थी नेते आणि विद्यार्थ्यांनी जुलै महिन्यात अनेकदा आंदोलने केली होती. परंतु कोणताच निर्णय झाला नसल्याने विद्यार्थ्यांनी शुक्रवारी परत एकदा आंदोलन केले. मात्र यावेळी विद्यापीठाच्या इतिहासात कधीच न घडलेली घटना घडली.

विद्यापीठाच्या कुलगुरुंना मारहाण : फी वाढी रद्द करावी आणि मागील आंदोलनात ज्या विद्यार्थ्यांना निलंबित केले होते. त्यांचे निलंबन रद्द करण्यात यावे, या मागणीसाठी अभाविपच्या विद्यार्थी नेत्यांनी कुलगुरुच्या कार्यालयावर मोर्चा आणला होता. कुलगुरुच्या कार्यालयात पोहोचल्यानंतर विद्यार्थी नेते आणि विद्यार्थी आपल्या मागण्या मांडत होते. त्याच दरम्यान पोलीस आणि त्यांच्यात वाद सुरू झाला. या वादाचे रुपांतर थेट धक्काबुक्कीत होत हाणामारी सुरू झाली. याच दरम्यान काही विद्यार्थ्यांनी कुलगुरू आणि कुलसचिवांना मारण्याचा प्रयत्न केला. वादादरम्यान कुलगुरू आणि कुलसचिव विद्यार्थ्यांच्या गराड्यात सापडले. त्यानंतर विद्यार्थ्यांनी त्या दोघांना मारहाण केली. विद्यार्थी नेत्यांनी कुलसचिवांना एवढी मारहाण केली की ते जमिनीवर पडले. कुलगुरूंना जबर मारहाण होणार होती, परंतु त्यांच्या सुरक्षा कर्मचाऱ्यांनी त्यांना कार्यालयात नेल्याने ते वाचले. यासर्व गोंधळात विद्यार्थी आणि पोलिसांमध्ये जोरदार धक्काबुक्की सुरू होती.

काय होत्या मागण्या : कँट पोलीस ठाण्याच्या हद्दीतील गोरखपूर विद्यापीठात शुक्रवारी सायंकाळी ही घटना घडली. दिवसभर अखिल भारतीय विद्यार्थी परिषदेचे विद्यार्थी नेते व विद्यार्थी नेत्यांनी आपल्या मागण्यांबाबत कुलगुरू कार्यालयावर धरणे आंदोलन केले होते. निलंबित विद्यार्थ्यांचे निलंबन आणि वाढीव फी वाढ मागे घ्या, हे विद्यार्थ्यांच्या हिताचे नाही. कुलगुरू आणि कुलसचिवांनी आपल्या मागण्यांचा विचार करावा, अशी विनंती विद्यार्थी वारंवार करत होते. गेल्या अनेक महिन्यांपासून विद्यार्थी विद्यापीठातील इतर विभागातील भ्रष्टाचाराच्या तक्रारीही करत होते. कुलगुरू आणि कुलसचिवांनी याकडे लक्ष द्यावे, अशी मागणी ते करत होते.

आधीही झाली धक्काबुक्की :आठवडाभरापूर्वी विद्यार्थी आणि कुलसचिव तसेच पोलीस कर्मचारी यांच्यात मारामारी झाल्याची घटनाही घडली होती. ज्यामध्ये 6 हून अधिक विद्यार्थ्यांना निलंबित करण्यात आले असून काहींविरोधात चौकशी सुरू आहे. याप्रकरणामुळे विद्यार्थी संतापले होते. ते परत शुक्रवारी पुन्हा एकदा संघटित झाले. संघटित झाल्यानंतर त्यांनी आपल्या मागण्या आणि विद्यार्थी सहकाऱ्यांचे निलंबन मागे घेण्याबाबत आवाज उठवण्यास सुरुवात केली. पण आंदोलनात वादाची ठिणगी पडली आणि हाणामारीची घटना घडली.