दाहोद (गुजरात) Scam of Rs 18 Crore :गुजरातच्या दाहोद जिल्ह्यात सहा बनावट कार्यालयं तयार करुन तब्बल 18.69 कोटी रुपयांचा घोटाळा केल्याची घटना उघडकीस आलीय. या प्रकरणात घोटाळेबाज संदीप राजपूत याची दाहोद पोलिसांनी ट्रान्सफर वॉरंटसह चौकशी केली. या घोटाळ्याचे धागेदोरे आता आयएएस अधिकारी बी.डी. निनामा यांच्यापर्यंच पोहोचलेत. निनामा हे 2019 मध्ये दाहोदमध्ये अनुदान विभागाचे प्रशासक होते. दाहोद पोलिसांनी निनामाला अटक केलीय. यामुळं सरकारी कर्मचाऱ्यांमध्ये एकच खळबळ उडालीय.
माजी आयएएस अधिकारी बी.डी. निनामांची न्यायालयात हजेरी : छोटा उदेपूर येथील बोडेलीत पाटबंधारे विभागाचं बनावट शासकीय कार्यालय तयार करून 4.15 कोटींचा घोटाळा करण्यात आला. या प्रकरणाचा तपास करणाऱ्या एसआयटी पथकाच्या तपासात धक्कादायक माहिती समोर आलीय. तसंच पुढील तपासात एसआटीच्या अहवालात आरोपी संदीप राजपूतनं दाहोद जिल्ह्यात सहा बनावट कार्यालयं तयार केल्याचं समोर आलंय. दाहोद जिल्ह्यातही आरोपींनी सरकारी अनुदानाचा गैरवापर केल्याचं दाहोद पोलिसांच्या तपासात उघड झालंय. पुरावे आणि माहिती गोळा करुन, दाहोद पोलिसांनी प्रथम प्रशासक, आयएएस अधिकारी बी.डी. निनामाला अटक केली. या प्रकरणाबाबत माजी आयएएस अधिकारी बी.डी. नीनामाला दाहोद पोलिसांनी पुढील तपासासाठी रिमांडवर घेण्यासाठी दाहोद न्यायालयात हजर केलं होतं, त्यामुळं सरकारी अधिकाऱ्यांमध्ये खळबळ उडालीय.