Building Collapses : इमारत कोसळून तीन नागरिक ठार तर सात गंभीर जखमी, गुजरातमधील जामनगरची घटना

गुजरातच्या जामनगरमध्ये तीन मजली इमारत कोसळून भीषण अपघात झाला. या अपघातात एकाच कुटूंबातील तीन जणांचा मृत्यू झाल्याने हळहळ व्यक्त करण्यात येत आहे. या अपघातात ढिगाऱ्याखाली 9 जण दबले होते, त्यांना बचावण्यात प्रशासनाला यश आले आहे.

जामनगर : तीन मजली इमारत कोसळून झालेल्या भीषण अपघातात तीन नागरिकांचा मृत्यू झाला, तर सात जण गंभीर जखमी झाले. ही घटना गुजरातच्या जामनगरमधील साधना कॉलनीत घडली. जयपाल सादिया, त्यांची पत्नी मितलबेन आणि त्यांचा सात वर्षांचा मुलगा शिवराज यांचा या घटनेत मृत्यू झाला. ही इमारत राहण्यास धोकादायक असल्याची माहिती नागरिकांना देण्यात आली होती. मात्र तरीही नागरिक या इमारतीत राहत असल्याची माहिती जामनगर महामंडळाचे आयुक्त डी एन मोदी यांनी दिली. या इमारतीत ढिगाऱ्याखाली दबलेल्या 9 नागरिकांना बचावण्यात यश आले आहे. जखमींना उपचारासाठी जामनगर येथील रुग्णालयात दाखल करण्यात आले आहे.

कसा झाला अपघात :जामनगर शहरातील साधना कॉलनीमध्ये गुजरात हाऊसिंग बोर्डाच्या 3 मजली इमारतीचा 30 वर्षे जुना भाग कोसळल्याने मोठी दुर्घटना घडली आहे. तीन मजली इमारतीत एकूण सहा फ्लॅट होते. मात्र हे कुटुंबीय ढिगाऱ्याखाली गाडले गेले. त्यामुळे यंत्रणेतील लोकांमध्ये संभ्रम निर्माण झाला होता. तात्काळ सुरू करण्यात आलेल्या बचाव मोहिमेत दोन कुटुंबातील नऊ जणांना ढिगाऱ्याखालून बाहेर काढण्यात आले. त्यानंतर त्यांना उपचारासाठी जामनगर येथील सिव्हिल हॉस्पिटलमध्ये हलवण्यात आले.

गर्भवती पत्नीसह पती आणि मुलाचा मृत्यू :एकाच कुटुंबातील तिघांचा मृत्यू झाल्याने त्यांच्या कुटुंबीयांमध्ये शोककळा पसरली आहे. गर्भवती पत्नी, पती आणि मुलाच्या मृत्यूने संपूर्ण परिसरात शोककळा पसरली आहे. साधना कॉलनी भागातील रहिवासी ब्लॉक क्रमांक 69 मध्ये ही घटना घडली. शुक्रवारी सायंकाळी घडलेल्या घटनेतील ढिगारा हटविण्यासाठी अग्निशमन विभागाने जेसीबीची मदत घेतली. केवळ अग्निशमन विभागच नाही तर महापालिकेचे पथकही बचाव कार्यात सहभागी झाले होते. एकूण सहा फ्लॅटपैकी दोन फ्लॅटमध्ये कुटुंब राहत होती. जयपाल सादिया, त्यांची पत्नी मितलबेन आणि सात वर्षांचा मुलगा शिवराज यांचा मृत्यू झाला.

मुख्यमंत्र्यांनी जाहीर केली आर्थिक मदत :मुख्यमंत्री भूपेंद्र पटेल यांनी या संपूर्ण घटनेची दखल घेऊन शोक व्यक्त केला आहे. याप्रकरणी प्रत्येक मृतांच्या कुटुंबीयांना 4 लाख रुपये आणि जखमींना 50 हजार रुपयांची आर्थिक मदत जाहीर करण्यात आली आहे. या घटनेत वाचलेल्या दोन्ही मुलींना पंतप्रधान सुकन्या अंतर्गत मदत दिली जाणार आहे. 51 हजार रुपयांची तात्काळ मदत देण्याची व्यवस्था करण्यात आली आहे. हॉस्पिटलला भेट देताना आमदार रिवाबा जडेजा यांनी ही घोषणा केली असून या दोन्ही मुली ढिगाऱ्याखाली गाडल्या गेल्या होत्या.

गर्दी झाल्याने बचाव कार्यात अडचण :ही इमारत ज्या ठिकाणी कोसळली तिच्या आजूबाजूचे रस्ते खूप छोटे आहेत. अपघातामुळे मोठ्या संख्येने लोक जमल्याने बचाव कार्यात अडचण निर्माण झाली होती. पोलीस कर्मचाऱ्यांनी लोकांना हटवल्यानंतर मार्ग मोकळा होऊ शकला. संपूर्ण परिसरातील वीजवाहिन्या खराब झाल्याने जनरेटरच्या सहाय्याने रात्री उशिरापर्यंत ढिगारा हटविण्यात आला.

इमारतीच्या छतावरून पडू लागली धूळ : या इमारतीच्या उर्वरित भागात राहणारे मनोज गोस्वामी यांनी सांगितले की, दुपारपासून इमारतीच्या छतावरून धूळ पडू लागली होती. स्थानिक नेते महावीर सिंह जडेजा यांनाही ही माहिती देण्यात आली. मात्र काही वेळातच ही इमारत धडाक्याने कोसळली. आम्ही वाचलो पण तीन जणांचा मृत्यू झाल्याने धक्का बसल्याचे त्यांनी यावेळी स्पष्ट केले.