പെരുന്നാളിനെ വരവേല്‍ക്കാന്‍ 'മൈലാഞ്ചി കൈകള്‍' ഒരുങ്ങി; സാഹോദര്യ പെരുന്നാൾ കാഴ്‌ചയായി മൈലാഞ്ചി കൂട്ടായ്‌മകള്‍ - പെരുന്നാൾ
കൊല്ലം:പെരുന്നാൾ ദിനമെത്തുമ്പോൾ മൊഞ്ചത്തിമാരുടെ കൈകളിൽ അഴക് പകരുവാൻ ബ്യൂട്ടി പാർലറുകളും ഇൻസ്‌റ്റന്‍റ് ഡിസൈനുകളുമെല്ലാം ഉണ്ടെങ്കിലും വീടുകളിലെ മൈലാഞ്ചി കൂട്ടായ്‌മ സാഹോദര്യത്തിന്‍റെ ഒരു പെരുന്നാൾ കാഴ്‌ച തന്നെയാണ്. വിവിധതരം മൈലാഞ്ചിക്കൂട്ടുമായി മൊഞ്ചത്തിമാരും കുട്ടിക്കൂട്ടങ്ങളും ഒത്തുകൂടുമ്പോൾ കൈകളിൽ വിരിയുന്നത് മൈലാഞ്ചി ചുവപ്പിന്‍റെ കരവിരുതുകളാണ്‌.
മൈലാഞ്ചി കൈകള്‍ ഒരുങ്ങി:മൈലാഞ്ചിയില്ലാതെ പെരുന്നാളാഘോഷമില്ല. പുതുവസ്ത്രങ്ങൾക്കൊപ്പം മൈലാഞ്ചി മൊഞ്ചോടെ പെരുന്നാളിനെ വരവേൽക്കുന്ന തിരക്കിലാണ് കുട്ടികൾ. പെരുന്നാളിന്‍റെ പ്രത്യേക ആകർഷണമായ മൈലാഞ്ചി തന്നെയാണ് ആഘോഷവേദിയിലെ താരം. പെരുന്നാളിന് മൊഞ്ചുകൂട്ടാൻ മൈലാഞ്ചി വിപണിയും സജീവമാണ്. പതിനായിരക്കണക്കിന് മെഹന്തി കോണുകളാണ് പെരുന്നാൾ സീസണായതോടെ കടകളിൽ വിറ്റഴിയുന്നത്.
കൈകളിലും കാൽപ്പാദങ്ങളിലും മൈലാഞ്ചി കൊണ്ട് ചിത്രപ്പണികൾ ഒരുക്കി മനോഹരമാക്കുന്ന പ്രൊഫഷനൽ ഡിസൈനർമാരും ബ്യൂട്ടിപാർലറുകളും ഇപ്പോൾ ധാരാളമുണ്ട്. പെരുന്നാൾ എത്തിയതോടെ കടകളിൽ മൈലാഞ്ചി തേടിയെത്തുന്നവരുടെ എണ്ണം കൂടിക്കഴിഞ്ഞു. ബ്യൂട്ടി പാർലറുകളിലും മെഹന്തിയണിയാൻ എത്തുന്നവരുടെ എണ്ണവും വർധിക്കുകയാണ്. പെരുന്നാളിനോടനുബന്ധിച്ച് വിവിധയിടങ്ങളിൽ മൈലാഞ്ചിയിടൽ മത്സരവും സംഘടിപ്പിച്ചിട്ടുണ്ട്.
Also read: പെരുന്നാള്‍ തലേന്ന് കശ്‌മീരികള്‍ വാങ്ങിയത് 100 കോടിയുടെ മാംസം ; പ്രിയം ആട്ടിറച്ചിക്ക്