വയനാട് പനമരത്ത് പുള്ളിപ്പുലി പരിക്കേറ്റ നിലയില്‍, ചികിത്സ നല്‍കാന്‍ വനംവകുപ്പ് - പുള്ളിപ്പുലി പരിക്കേറ്റു

പനമരം : പനമരം നീര്‍വാരം അമ്മാനിയില്‍ പരിക്കേറ്റ നിലയില്‍ പുള്ളിപ്പുലിയെ കണ്ടെത്തി. ചെതലയം ഫോറസ്റ്റ് റേഞ്ചിലെ വനാതിര്‍ത്തിയോട് ചേര്‍ന്ന ഓര്‍ക്കോട്ടുമൂല എന്ന സ്ഥലത്ത് തോട്ടില്‍ വീണു കിടക്കുന്ന നിലയിലാണ് പുള്ളിപ്പുലിയെ കണ്ടെത്തിയത് (Leopard injured). ഇന്ന് രാവിലെ പട്ടി നിര്‍ത്താതെ കുരയ്ക്കുന്നത് കേട്ടെത്തിയ നാട്ടുകാരാണ് പുള്ളിപുലിയെ കണ്ടത് (chethalayam forest range). തുടര്‍ന്ന് വനം വകുപ്പ് ഉദ്യോഗസ്ഥര്‍ സ്ഥലത്തെത്തി. ബത്തേരിയില്‍ നിന്നുള്ള ആര്‍ആര്‍ടി സംഘത്തിന്‍റെ സഹായത്തോടെ പുലിയെ രക്ഷപ്പെടുത്താനുള്ള ശ്രമം ആരംഭിച്ചു. കോഴിക്കോടും വയനാടും അടക്കമുള്ള ജില്ലയില്‍ അടുത്തിടെയായി പുലി-കടുവ പേടിയിലാണ്. വയനാട്ടില്‍ ഒരു കര്‍ഷകനെ കടുവ ആക്രമിച്ച് കൊന്ന വാര്‍ത്ത അടുത്തിടെ പുറത്ത് വന്നിരുന്നു. തൊഴുത്തില്‍ കെട്ടിയിരുന്ന പശുവിനെ കടുവ ഭക്ഷിച്ച വാര്‍ത്തയും രണ്ട് ദിവസം മുമ്പാണ് പുറത്ത് വന്നത്. കോഴിക്കോട് ജില്ലയിലെ കൂടരഞ്ഞിക്ക് സമീപം പൂവാറൻതോട് മേഖലയില്‍ കഴിഞ്ഞ ദിവസം  പുലിയെ കണ്ടതായി ചില യാത്രക്കാര്‍ പറഞ്ഞിരുന്നു. പൂവാറൻതോട് ജിഎൽപി സ്‌കൂളിന് സമീപം മേടപ്പാറയിലാണ് ഡിസംബർ 27 ന് രാത്രി പുലിയെ കണ്ടത്. രാത്രി എട്ട് മണിയോടെ ഇതുവഴി സഞ്ചരിച്ച കാർ യാത്രികനായ കാരാമാക്കൽ പ്രനൂപാണ് പുലിയെ കണ്ടത്. കാറിന്‍റെ മുൻ ക്യാമറയിൽ പുലിയുടെ ദൃശ്യങ്ങൾ പതിഞ്ഞു. 

Also Read: കിണറ്റിലകപ്പെട്ട പുലി ചത്ത സംഭവം; കണ്ണവം റേഞ്ച് ഓഫിസര്‍ക്കെതിരെ പരാതി, അന്വേഷണം തുടങ്ങി