കൊല്ലത്ത് വിദേശ വനിതയെ ഭർത്താവ് കഴുത്തറുത്ത് കൊലപ്പെടുത്തി

കൊല്ലം: വിദേശ വനിതയെ കുത്തിക്കൊലപ്പെടുത്തിയ ശേഷം ഭർത്താവ് ആത്മഹത്യക്ക് ശ്രമിച്ചു. ഇസ്രയേൽ സ്വദേശിയായ സാത്വയാണ് (36) മരിച്ചത്. കോടാലിമുക്ക് സ്വദേശി കൃഷ്‌ണചന്ദ്രനാണ് ഭാര്യയായ സാത്വയെ കുത്തിക്കൊലപ്പെടുത്തിയ ശേഷം ആത്മഹത്യയ്ക്ക് ശ്രമിച്ചത്. മരിച്ച യുവതിയുടെ കഴുത്തിലും തലയ്ക്ക് പിന്നിലും തോളിലും ആഴത്തിൽ കുത്തേറ്റിരുന്നു. യുവതിയെ കൊലപ്പെടുത്തിയ ശേഷം ഇയാൾ ആത്മഹത്യയ്ക്ക് ശ്രമിച്ചതായാണ് പ്രാഥമിക നിഗമനം. പുറത്തുപോയിരുന്ന വീട്ടുകാർ എത്തി വാതിൽ തകർത്ത് കയറിയപ്പോൾ ഇരുവരെയും രക്തത്തിൽ കുളിച്ചു കിടക്കുന്ന നിലയിൽ കണ്ടെത്തുകയായിരുന്നു. എന്നാൽ, ഇരുവരും ഒന്നിച്ച് ആത്മഹത്യ ചെയ്യാൻ തീരുമാനിച്ചതാണെന്നും യുവതി തന്നെയാണ് തന്നോട് കുത്തി കൊലപ്പെടുത്താൻ ആവശ്യപ്പെട്ടതെന്നും ഇയാൾ പൊലീസിന് മൊഴി നൽകി. ഋഷികേശിൽ വച്ച് യോഗ ക്ലാസ് നടത്തിവരുന്നതിനിടെ പരിചയപ്പെട്ട സാത്വയുമായി 15 വർഷമായി ഒന്നിച്ച് താമസിക്കുകയാണെന്നും തങ്ങളുടെ വിവാഹം കഴിഞ്ഞിരുന്നുവെന്നും ഇയാൾ പൊലീസിനോട് പറഞ്ഞു. ഗുരുതരമായി പരിക്കേറ്റ കൃഷ്‌ണചന്ദ്രനെ ആദ്യം ജില്ല ആശുപത്രിയിൽ പ്രവേശിപ്പിച്ചു. പിന്നീട് വിദഗ്‌ധ ചികിത്സക്കായി തിരുവനന്തപുരം മെഡിക്കൽ കോളജിലേക്ക് മാറ്റി. കൊല്ലപ്പെട്ട യുവതിയുടെ മൃതദേഹം ജില്ല ആശുപത്രി മോർച്ചറിയിലേക്ക് മാറ്റി.