എസ്.എം.എ രോഗം ബാധിച്ച യമന്‍ ബാലന്‍റെ ചികിത്സക്കായി കുടുംബം പാണക്കാട്ട്
മലപ്പുറം: എസ്.എം.എ രോഗം ബാധിച്ച യമന്‍ ബാലന്‍റെ ചികിത്സക്ക് സഹായം തേടി കുടുംബം പാണക്കാട്ട്. യമന്‍ പൗരന്‍ യാസീന്‍ അഹമ്മദ് അലി തൂനിസ് അബ്‌ദുല്ല ദമ്പതികളാണ് ഏക മകന്‍ ഹാഷിം യാസീന്‍റെ ചികിത്സക്ക് സഹായം അഭ്യര്‍ത്ഥിച്ച് പാണക്കാട് സയ്യിദ് സാദിഖലി ശിഹാബ് തങ്ങളുടെ വസതിയിലെത്തിയത്. ചികിത്സക്കുള്ള ഭീമമായ തുക കണ്ടെത്താന്‍ സഹായം തേടി രാവിലെ 10 മണിയോടെയാണ് ഇവര്‍ പാണക്കാട്ടെത്തിയത്.
എസ്.എം.എയുടെ ലക്ഷണങ്ങള്‍ കണ്ടുതുടങ്ങിയതോടെ വിദഗ്‌ധ ഡോക്‌ടര്‍മാരുടെ സേവനം തേടി കഴിഞ്ഞ സെപ്‌റ്റംബറിലാണ് യമനി കുടുബം ഇന്ത്യയിലെത്തിയത്. പൂനെയിലായിരുന്നു വിദഗ്‌ധ ചികിത്സ. അതിനിടെ ഏഴുവര്‍ഷം മുമ്പ് യമനില്‍ ഒരുമിച്ചു ജോലി ചെയ്ത പത്തനംതിട്ട കോഴഞ്ചേരി നെടിയത്ത് വീട്ടില്‍ ശ്രീജ, ഭര്‍ത്താവ് ഉല്ലാസ് എന്നിവരുമായി ബന്ധപ്പെട്ടു കഴിഞ്ഞ നവംബര്‍ മൂന്നിനാണ് ഇവര്‍ കേരളത്തിലെത്തിയത്.