കല്ലൂരിൽ ബസിടിച്ച് പരിക്കേറ്റ കാട്ടാനയെ മയക്കുവെടി വെച്ചേക്കും; നിരീക്ഷണം ശക്തമാക്കി വനം വകുപ്പ്

Wayanad Kalloor wild elephant injured by bus collision| വയനാട് കല്ലൂരിൽ ബസിടിച്ച് പരിക്കേറ്റ കാട്ടാനയെ ഇന്ന് മയക്കു വെടിവെച്ചേക്കും. തിങ്കളാഴ്‌ച പുലർച്ചെയാണ് അയ്യപ്പഭക്തർ സഞ്ചരിച്ച ബസിടിച്ച് ആനക്ക് ഗുരുതരമായി പരിക്കേറ്റത്.

ബത്തേരി: വയനാട് കല്ലൂരിൽ അയ്യപ്പഭക്തർ സഞ്ചരിച്ചിരുന്ന ബസ് ഇടിച്ച് പരിക്കേറ്റ കാട്ടാനയെ ഇന്ന് മയക്കു വെടിവെച്ചേക്കും. ആനയെ നിരീക്ഷിച്ച് നിലവിലെ ആരോഗ്യസ്ഥിതി പരിഗണിച്ച ശേഷമായിരിക്കും മയക്കുവെടി വയ്ക്കുക. രണ്ടുദിവസമായി ആന തീറ്റയും വെള്ളവും എടുത്തിരുന്നില്ല. ഇടിയുടെ ആഘാതത്തിൽ ആനക്ക് കാലിനും തോളിനും ഗുരുതരമായി പരിക്കേറ്റിട്ടുണ്ട്.

ആന വനംവകുപ്പ് നിരീക്ഷണത്തിൽ: അവശനായ ആന വെറ്റിനറി സർജൻ ഡോ അജേഷ് മോഹൻദാസിന്‍റെ നേതൃത്വത്തിലുള്ള വെറ്റിനറി സംഘത്തിൻ്റെയും വനം വകുപ്പിന്‍റെയും നിരീക്ഷണത്തിലാണ് കഴിയുന്നത്. വലത് കാലിനും, തോളിനും ഗുരുതരമായി പരിക്കേറ്റ കാട്ടാന രണ്ടു ദിവസമായി തീറ്റയും വെള്ളവും എടുക്കുന്നില്ലെന്നാണ് വനം വകുപ്പിന്‍റെ നിരീക്ഷണം.

30നും 40 നും ഇടയിലാണ് ആനയുടെ പ്രായം. ഇന്‍റേണൽ ബ്ലീഡിങ് ഉള്ളതിനാൽ ഉടൻ മയക്കുവെടി വെക്കാനുള്ള അനുമതിയ്‌ക്കായി ചീഫ് വൈൽഡ് ലൈഫ് വാർഡന് അപേക്ഷ നൽകിയിട്ടുണ്ട്. രണ്ട് കുങ്കിയാനകളടക്കം ആർആർ ടീമും സജ്ജമാണ്. പരിക്കേറ്റ ആന കലൂർ മേഖലയിലെ സ്ഥിരം സാനിധ്യമായിരുന്നുവെന്ന് നാട്ടുകാര്‍ പറഞ്ഞു.

ഡ്രൈവർക്കെതിരെ കേസ്: തിങ്കളാഴ്‌ച പുലർച്ചെയാണ് ശബരിമല ദർശനം കഴിഞ്ഞ്‌ മടങ്ങിയ കർണ്ണാടകയിൽ നിന്നുള്ള സംഘം സഞ്ചരിച്ച വാഹനം കല്ലൂർ 67 ഭാഗത്ത് വെച്ച്‌ കാട്ടാനയെ ഇടിച്ചത്. തുടർന്ന് ഗുരുതരമായി പരിക്കേറ്റ കാട്ടാന വനം വകുപ്പിൻ്റെ നിരീക്ഷണത്തിലായിരുന്നു. ആനയെ ഇടിച്ച ബസിന്‍റെ ഡ്രൈവർക്കെതിരെ വൈൽഡ് ലൈഫ് ആക്‌ട് പ്രകാരം നേരത്തെ കേസെടുത്തിരുന്നു.

ദിവസങ്ങൾക്ക് മുമ്പ് റാന്നി കുറുമ്പൻമൂഴിയിൽ ജനിച്ചു മണിക്കൂറുകൾ മാത്രം പിന്നിട്ട കുട്ടിയാനയെ റബ്ബർ തോട്ടത്തിൽ അവശനിലയില്‍ കണ്ടെത്തിയിരുന്നു. ആന വെച്ചൂച്ചിറ മൃഗാശുപത്രിയിൽ പരിചരണത്തിലാണ്. കുട്ടിയാനയുടെ ആരോഗ്യനില മെച്ചപ്പെട്ടു വരുന്നുണ്ട്. കൂട്ടം തെറ്റിയാകാം റബ്ബർ തോട്ടത്തിലെത്തിയതെന്നാണ് നിഗമനം. ഡോ ശ്യാം ചന്ദ്രൻ, വെച്ചൂച്ചിറ വെറ്ററിനറി സർജൻ ഡോ ആനന്ദ് ആർ കൃഷ്‌ണൻ എന്നിവരുടെ നേതൃത്വത്തിലാണ് ആനക്കുട്ടിയ്ക്ക് പരിചരണം നൽകുന്നത്.