ഭീതിയൊഴിയാതെ പിലാക്കാവ്; 2 മാസത്തിനിടെ കടുവ പിടികൂടിയത് 3 വളര്‍ത്ത് മൃഗങ്ങളെ, പ്രതിഷേധം ശക്തം
വയനാട് : പുതുശ്ശേരിയില്‍ കര്‍ഷകന്‍റെ ജീവനെടുത്തതിനെ പിടികൂടിയെങ്കിലും തൊട്ടുപുറകെ പിലാക്കാവില്‍ പശുവിനെ അക്രമിച്ച് കൊന്നതോടെ വീണ്ടും വയനാടിനെ കടുവ ഭീതി കീഴടക്കുന്നു. ഇന്ന് പശുവിനെ കൊന്ന അതേ പ്രദേശത്താണ് മുന്‍പ് ആടിനേയും, മറ്റൊരു പശുവിനേയും കടുവ കൊന്നത്. നവംബര്‍ 04ന് ജോണ്‍സന്‍റെ (ബിജു) ആടും, നവംബര്‍ 17ന് ഊന്നുകല്ലിങ്കല്‍ കുമാരന്‍റെ പശുക്കിടാവിനെയാണ് പിലാക്കാവ് മണിയന്‍ കുന്നില്‍വച്ച് കടുവ കൊന്നത്.
ഇതിന്‍റെ തുടര്‍ച്ചയായാണ് ഇന്നുച്ചയോടെ നടുതൊട്ടിയില്‍ ദിവാകരന്‍ എന്ന ഉണ്ണിയുടെ പശുക്കിടാവിനെ കടുവ കൊന്നത്. ഇതോടെ, നാട്ടുകാര്‍ പ്രതിഷേധവുമായി രംഗത്ത് എത്തുകയായിരുന്നു. സംഭവസ്ഥലം, എം എല്‍ എ ഒ ആര്‍ കേളു, ജില്ല പഞ്ചായത്ത് പ്രസിഡന്‍റ് സംഷാദ് മരക്കാര്‍, ജനപ്രതിനിധികള്‍ തുടങ്ങിയവര്‍ സന്ദര്‍ശിച്ചു.