വയനാട്:സംസ്ഥാനത്തിന്‍റെ വായ്‌പ പരിധി കേന്ദ്രം വെട്ടി കുറച്ചതിൽ എല്ലാവരും ദുഃഖിക്കുമ്പോള്‍ മലയാളിയായ കേന്ദ്ര സഹമന്ത്രി വി.മുരളീധരന്‍ സന്തോഷിച്ച് തുള്ളി ചാടുകയാണെന്ന് പൊതുമാരാമത്ത് മന്ത്രി പിഎ മുഹമ്മദ് റിയാസ്. കേരളത്തിന്‍റെ ആരാച്ചാരെ പോലെ അദ്ദേഹം പെരുമാറുന്നത് ദൗർഭാഗ്യകരമാണെന്നും അദ്ദേഹം കല്‍പ്പറ്റയില്‍ മാധ്യമപ്രവര്‍ത്തകരോട് പറഞ്ഞു. സംസ്ഥാനത്തിന് വേണ്ടി കേന്ദ്രവുമായി ഇടപെട്ട് പ്രശ്‌നം പരിഹരിക്കേണ്ടയാളാണ്‌ അദ്ദേഹം.
കേരളത്തിലെ ജനങ്ങളെയാകെ പ്രയാസത്തിലേക്ക് തള്ളിവിടുന്ന നീക്കം കേന്ദ്ര സർക്കാരിലുള്ള സാധീനം ഉപയോഗിച്ച് മാറ്റിയെടുക്കുന്നതിന് പകരം അതിൽ ആനന്ദം കണ്ടെത്തുന്നത്‌ പ്രത്യേക മാനസികാവസ്ഥയാണെന്നും അദ്ദേഹം പറഞ്ഞു. വായ്‌പ പരിധി വെട്ടിക്കുറക്കുന്നതിൽ ഒരാളും സന്തോഷിക്കില്ല. മലയാളിക്ക് മാത്രമല്ല ഒരാൾക്കും സന്തോഷത്തിന് വക നൽകുന്ന കാര്യമല്ല ഒരു സംസ്ഥാനത്തിന്‍റെ വായ്‌പ പരിധി വെട്ടിക്കുറക്കുന്നത്. സംസ്ഥാനത്തിന്‍റെ അവകാശമാണതെന്നും മന്ത്രി പറഞ്ഞു.
അങ്ങനെയുള്ള ഒരു വിഷയത്തിൽ ഒരു കേന്ദ്ര മന്ത്രി സന്തോഷിക്കുക. അതും ഒരു മലയാളിയെന്നത് വല്ലാത്തൊരു മാനസികാവസ്ഥ തന്നെയാണെന്നും മന്ത്രി കുറ്റപ്പെടുത്തി. 8000 കോടി രൂപയാണ് ഇത്തവണ കേന്ദ്ര സര്‍ക്കാര്‍ വെട്ടിക്കുറച്ചത്. 32,000 കോടി രൂപയാണ് കേരളം ആവശ്യപ്പെട്ടത്. 23,000 ത്തോളം ഉണ്ടായിരുന്നത് വായ്‌പ ഇപ്പോൾ 15,000 കോടിയിലേക്കെത്തി. ഇതിൽ മലയാളിയായ ഒരു കേന്ദ്രമന്ത്രി സന്തോഷിച്ച് തുള്ളിച്ചാടുകയാണ്.
യഥാർഥത്തിൽ സംസ്ഥാനത്തിന് വേണ്ടി ഇടപെട്ട് മുന്നോട്ട് പോകേണ്ട വ്യക്തിയാണ് അദ്ദേഹം. കേന്ദ്ര സർക്കാരിൽ അദ്ദേഹത്തിനുള്ള സ്വാധീനം ഉപയോഗിച്ച് കേന്ദ്രം കേരളത്തിലെ ജനങ്ങളെയാകെ പ്രയാസത്തിലേക്ക് തള്ളിവിടുന്ന സാഹചര്യം ഇല്ലാതാക്കാൻ ശ്രമിക്കേണ്ടത് അദ്ദേഹമാണ്. എൽഡിഎഫിന് വേണ്ടി വോട്ട് ചെയ്‌തവരെയും ചെയ്യാത്തവരെയും ബിജെപിക്ക് വേണ്ടി പ്രവർത്തിക്കുന്നവരെയുമെല്ലാം ഇത് ബാധിക്കും.