.
വയനാട് ജില്ലയിലെ കല്പറ്റ, മാനന്തവാടി, സുൽത്താൻ ബത്തേരി നിയമസഭാ മണ്ഡലങ്ങളിലെ പ്രവർത്തകരുടെ കൺവെൻഷനുകളാണ് എല്‍ഡിഎഫ് സംഘടിപ്പിച്ചത്. കല്പറ്റയിൽ നടന്ന കൺവെൻഷനിൽ മാധ്യമങ്ങൾക്ക് പ്രവേശനം അനുവദിച്ചില്ല. ബൂത്ത് തലത്തിൽ ഇടതുമുന്നണിയുടെ പ്രവർത്തനം ശക്തിപ്പെടുത്താൻ തീരുമാനിച്ചതായി കൺവെൻഷനു ശേഷം സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ പറഞ്ഞു.
ബിജെപിയുടെ നയങ്ങൾക്കൊപ്പം തന്നെ കോൺഗ്രസിന്‍റെ ദേശീയ നയങ്ങളും തെരഞ്ഞെടുപ്പിൽ പ്രചരണായുധമാക്കാനാണ് മുന്നണിയുടെ തീരുമാനം. രാഹുൽ ഗാന്ധിയെ ഭയക്കുന്നില്ല എന്നു പരസ്യമായി പറയുന്നമ്പോഴും, രാഹുലിനെ ശക്തമായി നേരിടാനുള്ള തന്ത്രങ്ങളാണ് ഇടതു നേതാക്കൾ മെനയുന്നത്.
വയനാട് ലോക്സഭാ മണ്ഡലത്തിലെ 7 നിയമസഭാ മണ്ഡലങ്ങളിൽ നാലും ഇടതു മുന്നണിക്കൊപ്പമാണ്. മുന്നണി അനുഭാവികളുടെ ഒരൊറ്റ വോട്ട് പോലും ചോരാതിരിക്കാനാണ് നേതാക്കളുടെ ശ്രമം. അതേസമയം മണ്ഡലത്തിൽ എൻഡിഎ സ്ഥാനാർത്ഥിയായ തുഷാർ വെള്ളാപ്പള്ളിയും പ്രചരണം തുടങ്ങി. കല്പറ്റയിൽ റോഡ് ഷോ യോടെയായിരുന്നു പ്രചരണത്തിൻ്റെ തുടക്കം.