തൃശൂരിൽ യെല്ലോ അലർട്ട് ; അപകടഭീഷണിയുള്ള സ്ഥലങ്ങളിൽ നിന്ന് ജനങ്ങളെ ഒഴിപ്പിക്കുന്നു

ചാലക്കുടി താലൂക്കിലെ പരിയാരം, കൊടകര എന്നിവിടങ്ങളിലായി രണ്ട് ക്യാമ്പുകള്‍ ; 15 കുടുംബങ്ങളിൽ നിന്നുള്ള 55 പേർ

തൃശൂർ : അറബിക്കടലിലും ബംഗാൾ ഉൾക്കടലിലും രൂപം കൊണ്ട ന്യൂനമർദത്തിന്‍റെ ഫലമായി സംസ്ഥാനത്തുണ്ടായ കനത്ത മഴയെ തുടർന്ന് മണ്ണിടിച്ചിൽ ഭീഷണി നിലനിൽക്കുന്ന പ്രദേശങ്ങളിൽ നിന്ന് ജനങ്ങളെ ഒഴിപ്പിക്കുന്നു. പുത്തൂർ പഞ്ചായത്തിലെ കോക്കാത്ത് കോളനി, ചിറ്റക്കുന്ന് പ്രദേശങ്ങളിൽ നിന്നുമാണ് ആളുകളെ മാറ്റുന്നത്. തഹസിൽദാർ, ഒല്ലൂർ പൊലീസ്, പുത്തൂർ പഞ്ചായത്ത് അധികൃതര്‍ എന്നിവരുടെ നേതൃത്വത്തിലാണ് നടപടി.

ജില്ലയിൽ പൊതുവേ മഴ കുറഞ്ഞ സാഹചര്യമാണുള്ളത്. ജില്ലയിൽ ഇന്ന് യെല്ലോ അലർട്ടാണ്. ഡാമുകൾ എല്ലാം തുറന്ന അവസ്ഥയിൽ വെള്ളപ്പൊക്ക ഭീഷണി തുടരുകയാണ്. ഭാരതപ്പുഴ, മണലിപ്പുഴ എന്നിവയുടെ തീരത്തുള്ളവർക്ക് ജാഗ്രതാനിർദേശം നൽകിയിട്ടുണ്ട്.

മണലിപ്പുഴയിൽ ജലനിരപ്പ് വാണിങ് ലെവലിന് മുകളിലെത്തി. പുഴയുടെ തീരത്ത് താമസിക്കുന്നവരെ മാറ്റി പാർപ്പിക്കാനുള്ള സംവിധാനങ്ങൾ ഒരുക്കി വരികയാണ്. ജാഗ്രതാനിർദേശത്തെ തുടർന്ന് പലരും ബന്ധുവീടുകളിലേക്ക് മാറുന്നുണ്ട്.

ഭാരതപ്പുഴയുടെ തീരത്തെ തിരുവില്വാമല, പാഞ്ഞാൾ, കൊണ്ടാഴി പഞ്ചായത്തുകളിലും സുരക്ഷാമുന്നറിയിപ്പ് നൽകിയിട്ടുണ്ട്. ഇവിടെയും വെള്ളം കയറാൻ സാധ്യതയുള്ള പ്രദേശങ്ങളിൽ നിന്ന് ജനങ്ങളെ ഒഴിപ്പിക്കുന്നുണ്ട്.

ജില്ലയിൽ രണ്ട് ദുരിതാശ്വാസ ക്യാമ്പുകൾ

ചാലക്കുടി താലൂക്കിലെ പരിയാരം, കൊടകര എന്നിവിടങ്ങളിലായി രണ്ട് ക്യാമ്പുകളാണ് തൃശൂരിൽ പ്രവർത്തിക്കുന്നത്. 15 കുടുംബങ്ങളിൽ നിന്നുള്ള 55 പേർ ഇവിടെയുണ്ട്. മണലിപ്പുഴയിലെ ജലനിരപ്പ് ഉയരുന്ന സാഹചര്യത്തിൽ ഇന്ന് വൈകിട്ടോടെ കൂടുതൽ ക്യാമ്പുകൾ തുടങ്ങാൻ സാധ്യതയുണ്ട്.

അടിയന്തര സഹചര്യങ്ങളിൽ രക്ഷാപ്രവർത്തനങ്ങൾക്കായി 11 മത്സ്യത്തൊഴിലാളികളുടെ ടീം ജില്ലയിൽ സജ്ജമാണ്. കൂടാതെ മത്സ്യഫെഡും വള്ളങ്ങൾ സജ്ജമാക്കിയിട്ടുണ്ട്.

വിനോദ സഞ്ചാര കേന്ദ്രങ്ങൾ അടച്ചു

ജില്ലയിലെ ബീച്ചുകൾ ഉൾപ്പെടെ എല്ലാ വിനോദ സഞ്ചാര കേന്ദ്രങ്ങളും ശനിയാഴ്‌ച മുതൽ മൂന്നുദിവസത്തേക്ക് അടച്ചു. ജനങ്ങൾ ഇത്തരം മേഖലകളിലേക്ക് പോകരുതെന്ന് കർശന നിർദേശമുണ്ട്.