തൃശ്ശൂർ : തൃശൂർ ജില്ലയിലും സമീപ ജില്ലകളിലെ വിവിധ പഞ്ചായത്തുകളിലും കുടിവെള്ളത്തിനും കാർഷികാവശ്യത്തിനും ആശ്രയിക്കുന്ന പീച്ചി ഡാമിൽ ജലനിരപ്പ് താഴുന്നു. ഇടവപ്പാതി പിന്നിട്ടിട്ടും മഴ ലഭിക്കാത്തതാണ്‌ ജലനിരപ്പ് മുൻ വർഷത്തേതിലും താഴാൻ ഇടയാക്കിയത്. പീച്ചി ഡാമിൽ നിന്നും കനാൽ വഴി വെള്ളം എത്തിച്ചാണ് ജില്ലയുടെ വിവിധ ഭാഗങ്ങളിൽ കൃഷി സാധ്യമാകുന്നത്.
പീച്ചി ഡാമിൽ ജലനിരപ്പ് കുറയുന്നു: കുടിവെള്ളവും കൃഷിയും ആശങ്കയില്‍ കഴിഞ്ഞവർഷം ഇതേ സമയത്ത് 27 മില്ലിമീറ്റർ ക്യുബ് വെള്ളം അവശേഷിച്ചിരുന്ന ഡാമിൽ ഇന്നുള്ളത് 10 മില്ലിമീറ്റർ ക്യുബ് മാത്രം. നിലവിൽ കുടിവെള്ള വിതരണത്തിനുള്ള വെള്ളം മാത്രമാണ് ഡാമിൽ അവശേഷിക്കുന്നതെന്നും കൂടുതൽ മഴയും നീരൊഴുക്കും ലഭിച്ചാൽ മാത്രമേ കൃഷിക്കായി വെള്ളം വിട്ടുനൽകാനാകൂ എന്ന് പീച്ചി ഡാം അസിസ്റ്റന്‍റ് എൻജിനിയർ ഗീത അയ്യർ പറഞ്ഞു.
ഡാമുകളിലെ ജലനിരപ്പ് താഴ്ന്നതോടെ അനുബന്ധ പുഴകളിലും വെള്ളമില്ലാതായി. ഭാരതപ്പുഴ, കരുവന്നൂർ പുഴ, ആറാട്ടുപുഴയടക്കമുള്ളവയിലും ജലനിരപ്പ് താഴ്ന്നു. വരും ദിവസങ്ങളിൽ ശക്തമായ മഴ ലഭിച്ചില്ലെങ്കിൽ കൃഷിക്കും കുടിവെള്ളത്തിനും വലിയ പ്രതിസന്ധി നേരിടേണ്ടി വരും. കഴിഞ്ഞ വർഷം 60 ദശലക്ഷം ഘനയടി വെള്ളമാണ് ജലസേചനത്തിനായി നൽകിയത്. ഇപ്പോൾ അവശേഷിക്കുന്ന വെള്ളം ഉപയോഗിച്ച് അടുത്ത അഞ്ച്‌ മാസത്തേക്ക് തൃശൂർ നഗരത്തിലെ കുടിവെള്ള വിതരണത്തിനായി ഉപയോഗിക്കാം.
ജില്ലയിലെ തന്നെ മറ്റൊരു ജലസംഭരണികളായ ചിമ്മിനി ഡാമിൽ 50.45 മീറ്റർ ജലമാണ് അവശേഷിക്കുന്നത്. 2018 ജൂലായ് രണ്ടിന് 60.09മീറ്റർ ആയിരുന്നു. വാഴാനിയിൽ 47.06 മീറ്റർ ആണ് ജലനിരപ്പ്. 2018 ജൂലായ് രണ്ടിന് 53.60മീറ്ററായിരുന്നു ജലനിരപ്പ്. കനാൽവഴിയുള്ള ജലവിതരണം നിർത്തിവയ്ക്കുന്നതിലൂടെ സമീപ പ്രദേശങ്ങളിലെ കിണറുകൾ വറ്റുകയും കടുത്ത ജല ദൗർലഭ്യം നേരിടുകയും ചെയ്യും.
