തൃശൂർ:തൃശൂർ പൂരത്തിന്‍റെ ഏറ്റവും വലിയ ആകർഷണങ്ങളിൽ ഒന്നാണ് കുടമാറ്റം. കഴിഞ്ഞ വർഷം കൊവിഡ് മഹാമാരിയായി ആഞ്ഞടിച്ചപ്പോൾ പൂരം പോലും ചടങ്ങിലൊതുങ്ങി. പക്ഷേ ഇത്തവണ പൂര പ്രേമികൾ പ്രതീക്ഷയിലായിരുന്നു. അതുകൊണ്ടുതന്നെ രണ്ടരമാസം മുമ്പ് തന്നെ അണിയറയിൽ കുടകൾ ഒരുങ്ങി തുടങ്ങിയിരുന്നു. പക്ഷേ ഇത്തവണ രണ്ട് സെറ്റ് കുടകൾ മാത്രമാകും ഇരു വിഭാഗവും ഉയർത്തുക. മാത്രമല്ല പാറമേക്കാവ് വിഭാഗം എഴുന്നള്ളിപ്പിൽ 15 ആനകൾ ഉണ്ടാകുമെങ്കിലും തിരുവമ്പാടിക്ക് ഇത്തവണ ഒരാനപ്പുറത്താണ് പൂരം. അതുകൊണ്ടു തന്നെ തെക്കോട്ടിറക്കത്തിന് വർണ കുടകൾ ഉണ്ടെങ്കിലും ഉയർത്താനാകാത്ത അവസ്ഥയാണ്. വർണ വിസ്‌മയം നിറയുന്ന പ്രൗഢോജ്വലമായ ഒരു കുടമാറ്റത്തിന് പൂരപ്രേമികൾ ഇനിയും ഒരാണ്ട് കാത്തിരിക്കണം.
പുരുഷോത്തമൻ അരണാട്ടുകരയാണ് തിരുവമ്പാടി വിഭാഗത്തിനായി കുടകൾ ഒരുക്കുന്നത്. പുരുഷോത്തമൻ 42 വർഷമായി ഈ രംഗത്തുണ്ട്. 20 സെറ്റ് കുടയാണ് ഇത്തവണ നിർമിക്കുന്നത്. ഒരു സെറ്റ് എന്നു പറഞ്ഞാൽ 15 കുടകളാണ്. രഹസ്യ കുടകൾ ഇല്ലാതെ തന്നെ 40 സെറ്റിലധികം കുടകൾ മുൻ വർഷങ്ങളിൽ ഉണ്ടാക്കിയിരുന്നു. പരസ്യപ്പെടുത്താതെ കുടമാറ്റ സമയത്തു മാത്രം പുറത്തെടുക്കുന്ന കുടകളെ രഹസ്യ കുടകളെന്നാണ് അറിയപ്പെടുന്നത്.