തൃശ്ശൂര്‍ പൂരലഹരിയിലേയ്ക്ക്; പൂരങ്ങളുടെ പൂരം ചൊവ്വാഴ്ച

പൂരവിളംബരമറിയിച്ച് കുറ്റൂർ നെയ്തലക്കാവിലമ്മ എറണാകുളം ശിവകുമാറിന്റെ ശിരസിലേറി വടക്കുന്നാഥനെ വണങ്ങി. ശേഷം തെക്കേഗോപുരനട തള്ളിതുറന്ന ഗജവീരന്‍ പുറത്ത് കാത്ത് നിന്ന പുരുഷാരത്തിന്‍റെ ആരവങ്ങളും ആര്‍പ്പുവിളികള്‍ക്കും പുഷ്പവൃഷ്ടിയും കണ്ട് തുമ്പി ഉയർത്തി പൂരമറിയിച്ചു.

തൃശ്ശൂര്‍:ചരിത്ര പ്രസിദ്ധമായ തൃശ്ശൂര്‍ പൂരം നാളെ (ചൊവ്വാഴ്ച). പൂരത്തിനായി തൃശ്ശൂര്‍ നഗരി ഒരുങ്ങിക്കഴിഞ്ഞു. പൂരവിളംബരമറിയിച്ച് കുറ്റൂർ നെയ്തലക്കാവിലമ്മ എറണാകുളം ശിവകുമാറിന്റെ ശിരസിലേറി വടക്കുന്നാഥനെ വണങ്ങി. ശേഷം തെക്കേഗോപുരനട തള്ളിതുറന്ന ഗജവീരന്‍ പുറത്ത് കാത്ത് നിന്ന പുരുഷാരത്തിന്‍റെ ആരവങ്ങളും ആര്‍പ്പുവിളികള്‍ക്കും പുഷ്പവൃഷ്ടിയും കണ്ട് തുമ്പി ഉയർത്തി പൂരമറിയിച്ചു.

ശ്രീമൂലസ്ഥാനത്തെത്തി നിലപാട് തറയിൽ പ്രവേശിച്ച ശേഷം മൂന്ന് തവണ ശംഖ് മുഴക്കി പൂര വിളംബരം നടത്തി. ഇതോടെ പൂരങ്ങളുടെ പൂരത്തിന് തുടക്കമായി. രാവിലെ എട്ടോടെ കുറ്റൂർ നെയ്തലക്കാവ് ക്ഷേത്രത്തിൽ നിന്നും മേളത്തിന്റെ അകമ്പടിയോടെയാണ് നെയ്തലക്കാവിലമ്മ പുറപ്പെട്ടത്.

സേവ്യർ ചിറ്റിലപ്പിള്ളി എം.എല്‍.എ അടക്കമുള്ളവർ എഴുന്നെള്ളത്തിനെ അനുഗമിച്ചിരുന്നു. പത്തരയോടെ വടക്കുന്നാഥ ക്ഷേത്ര മെെതാനത്ത് എത്തിയ ശിവകുമാറിനേയും കാത്ത് ആരാധകർ തെക്കേ ഗോപുര നടയിലും പടിഞ്ഞാറേ നടയിലും മണികണ്ഠനാലിലും ഉണ്ടായിരുന്നു. പടിഞ്ഞാറെ ഗോപുരം കടന്ന് വടക്കും നാഥനെ വണങ്ങി പൂരമറിയിച്ചു.

പിന്നീട് തെക്കേഗോപുര വാതിൽ പൂരത്തിനായി തുറന്നിട്ട് നിലപാടുതറയിലേയ്ക്കു നീങ്ങി പുരവിളംബര നടത്തി. മന്ത്രി സജി ചെറിയാനും തെക്കേ ചടങ്ങില്‍ പങ്കെടുക്കാന്‍ എത്തിയിരുന്നു. ഇന്നലെ രാവിലെ തിരുവമ്പാടിയിലും പാറമേക്കാവിലും ആരംഭിച്ച ചമയപ്രദർശനം ഇന്നും തുടരുന്നുണ്ട്.

ആയിരങ്ങളാണ് ചമയപ്രദർശനത്തിനെത്തുന്നത്. പൂരപ്പിറ്റേന്ന് പുലർച്ചെ നടക്കുന്ന വെടിക്കെട്ടിനുള്ള ഒരുക്കങ്ങളും തുടരുകയാണ്. നൂറ്റാണ്ട് പിന്നിട്ടിട്ടും ഓരോ പൂരവും അവിസ്മരണീയവും പുതുമയേറിയതുമായ അനുഭവമാണ് പൂരപ്രേമികൾക്ക് സമ്മാനിക്കുന്നത്.