തൃശൂരിൽ ഒഴുക്കില്‍പ്പെട്ട് കാണാതായ മൂന്ന് വയസുകാരന്‍റെ മൃതദേഹം കണ്ടെത്തി

കുളിപ്പിക്കാനായി നിര്‍ത്തിയ സമയത്ത് കുട്ടി പെട്ടെന്ന് ഓടി തൊട്ടടുത്തുള്ള തോട്ടില്‍ കാല്‍ വഴുതി വീഴുകയായിരുന്നുവെന്ന് പ്രദേശവാസികള്‍ പറയുന്നു.

തൃശൂർ: വേളൂക്കര പട്ടേപ്പാടത്ത് തോട്ടില്‍ ഒഴുക്കില്‍പ്പെട്ട് കാണാതായ മൂന്ന് വയസുകാരന്‍റെ മൃതദേഹം കണ്ടെത്തി. പട്ടേപ്പാടം അലങ്കാരത്ത്പറമ്പില്‍ ബെന്‍സിലിന്‍റെയും ബെന്‍സിയുടെയും ഏക മകന്‍ ആരോം ഹെവന്‍ ആണ് ഞായറാഴ്‌ച രാവിലെ ഒഴുക്കില്‍പെട്ട് കാണാതായത്.

വീട്ടില്‍ കുളിപ്പിക്കാനായി നിര്‍ത്തിയ സമയത്ത് പെട്ടെന്ന് ഓടി തൊട്ടടുത്തുള്ള തോട്ടില്‍ കാല്‍ വഴുതി വീഴുകയായിരുന്നു. കുട്ടിയുടെ അമ്മയും കൂടെ ചാടിയെങ്കിലും കഴിഞ്ഞ ദിവസം പെയ്‌ത കനത്ത മഴയില്‍ തോട്ടില്‍ ശക്തമായ കുത്തൊഴുക്കുണ്ടായതിനാല്‍ കുട്ടിയെ കണ്ടെത്താനായില്ല.

തുടർന്ന് ഇരിങ്ങാലക്കുട പൊലീസും ഫയര്‍ഫോഴ്‌സും തൃശൂരിൽ നിന്നുള്ള മുങ്ങൽ വിദഗ്‌ധരും ചേർന്ന് നടത്തിയ തെരച്ചിലിനൊടുവിലാണ് കുട്ടിയുടെ മൃതദേഹം കണ്ടെത്തിയത്.