തൃശ്ശൂർ: പാലക്കാട് മഞ്ചിക്കണ്ടിയിൽ തണ്ടർബോൾട്ട് വെടിവെപ്പിൽ കൊല്ലപ്പെട്ട മാവോയിസ്റ്റിന്‍റെ മൃതദേഹം തിരിച്ചറിഞ്ഞു. തൃശ്ശൂർ മെഡിക്കൽ കോളേജിൽ സൂക്ഷിച്ചിരുന്ന മൃതദേഹമാണ് തമിഴ്‌നാട് സ്വദേശി കേശവ് എന്ന് വിളിക്കുന്ന ശ്രീനിവാസാണെന്ന് തിരിച്ചറിഞ്ഞത്. ഡിഎൻഎ പരിശോധനയിലൂടെയാണ് മൃതദേഹം ശ്രീനിവാസിന്‍റേതെന്ന് സ്ഥിരീകരിച്ചത്. മൃതദേഹം ബന്ധുക്കൾക്ക് വിട്ടു കൊടുത്തു.
അരവിന്ദ് എന്ന പേരിലാണ് മൃതദേഹം മെഡിക്കൽ കോളേജിൽ സൂക്ഷിച്ചിരുന്നത്. മാധ്യമങ്ങളിൽ പ്രസിദ്ധീകരിച്ച കൊല്ലപ്പെട്ട മാവോയിസ്റ്റുകളുടെ കൂട്ടത്തിൽ ശ്രീനിവാസിന്‍റെ ഫോട്ടോകൾ കണ്ടതിന്‍റെ അടിസ്ഥാനത്തിൽ രണ്ടാഴ്‌ച മുമ്പ് തമിഴ്‌നാട്ടിൽ നിന്ന് ശ്രീനിവാസിന്‍റെ ബന്ധുക്കൾ മ്യതദേഹം കാണാൻ എത്തിയിരുന്നു. എന്നാൽ മൃതദേഹം ജീർണിച്ച അവസ്ഥയിലായിരുന്നതിനാൽ തിരിച്ചറിയാൻ സാധിച്ചിരുന്നില്ല. തുടർന്ന് ശ്രീനിവാസിന്‍റെ സഹോദരന്മാരായ രാജഗോപാലിന്‍റെയും ജയരാമന്‍റെയും രക്തസാമ്പിളുകൾ ശേഖരിച്ച് ഡിഎൻഎ പരിശോധന നടത്തി. ശ്രീനിവാസിന്‍റേതാണെന്ന് വ്യക്തമായതിനെ തുടർന്ന് മൃതദേഹം ബന്ധുക്കൾക്ക് വിട്ടു നൽകി. മണിവാസകത്തിന്‍റെയും കാർത്തിയുടെയും മൃതദേഹങ്ങൾ ബന്ധുക്കൾ നേരത്തെ ഏറ്റുവാങ്ങി സംസ്‌കരിച്ചിരുന്നു. കൊല്ലപ്പെട്ടവരിലെ ഏക സ്‌ത്രീയായിരുന്ന അജിതയുടെ മൃതദേഹം പൊലീസ് കഴിഞ്ഞ ദിവസം പൊതുശ്‌മശാനത്തിൽ സംസ്‌കരിച്ചിരുന്നു.
