തൃശ്ശൂര്‍: 25 വർഷം മുമ്പ് വായ്‌പ എടുത്ത രണ്ട് ലക്ഷം രൂപക്ക് പകരമായി രണ്ടരക്കോടി വിലവരുന്ന ദേശീയപാതയോരത്തെ ഭൂമി സ്വന്തമാക്കാൻ പഞ്ചാബ് നാഷണല്‍ ബാങ്ക് ശ്രമിക്കുന്നെന്ന് പരാതി. വായ്‌പാ കുടിശികയുടെ പേരിൽ വായ്‌പ തുകയേക്കാൾ മൂല്യമുള്ള സ്ഥലം ബാങ്ക് കൈവശപ്പെടുത്താൻ ശ്രമിക്കുന്നു എന്നാരോപിച്ച് കുടുംബം ഹൈക്കോടതിയെ സമീപിച്ചിരുന്നു. ഇതേത്തുടർന്ന് കുടുംബത്തെ കുടിയൊഴിപ്പിക്കാനാകില്ലെന്നും ബാങ്കിന്‍റെ ബാധ്യത തീർത്ത് താമസസ്ഥലം വഴിയോട് കൂടി വിട്ടു നൽകണമെന്നും ഹൈക്കോടതി വിധിച്ചു. എന്നാല്‍ ഹൈക്കോടതി വിധി അംഗീകരിക്കാൻ ബാങ്ക് അധികൃതർ തയ്യാറാകുന്നില്ലെന്നാണ് കുടുംബത്തിന്‍റെ ആക്ഷേപം.
കാൽനൂറ്റാണ്ട് മുമ്പാണ് ബേക്കറി നടത്തിപ്പിനായി തന്‍റെ ഇരുപത്തി മൂന്നര സെന്‍റ് സ്ഥലം ഈട് വച്ച് തൃശൂര്‍ തലോർ സ്വദേശി വർഗീസ് രണ്ട് ലക്ഷത്തി മുപ്പതിനായിരം രൂപ പുതുക്കാട് നെടുങ്ങാടി ബാങ്കിൽ നിന്നും വായ്‌പ എടുക്കുന്നത്. ഇതിനിടെ നഷ്ടത്തിലായ നെടുങ്ങാടി ബാങ്ക് പഞ്ചാബ് നാഷണല്‍ ബാങ്ക് ഏറ്റെടുത്തു. വായ്‌പ തിരിച്ചടവ്‌ മുടങ്ങിയതിനെത്തുടർന്ന് 2002 ൽ ഇരിങ്ങാലക്കുട കോടതിയില്‍ നിന്നും സമ്പാദിച്ച വിധിയുടെ അടിസ്ഥാനത്തിൽ പിഎന്‍ബി വര്‍ഗീസിന്‍റെ സ്ഥലം ഏറ്റെടുക്കാനുള്ള നടപടികള്‍ ആരംഭിക്കുകയായിരുന്നു.