തൃശൂരില്‍ പെണ്‍കുട്ടി ബൈക്കില്‍ നിന്ന് വീണു, ഓടിച്ച വിദ്യാർഥിക്കുനേരെ ക്രൂരമായ സദാചാര ആക്രമണം, കല്ലുകൊണ്ട് തലയ്ക്കടിച്ചു

മർദനമേറ്റത് തൃശൂർ ചേതന കോളജിലെ ബിരുദ വിദ്യാർഥിയായ ചീയാരം സ്വദേശി അമലിന്

തൃശൂർ :തൃശൂരിൽ വിദ്യാർഥിനി ബൈക്കിൽ നിന്ന് വീണതിന് ബൈക്കോടിച്ച സഹപാഠിക്ക് ക്രൂര മർദനം. തൃശൂർ ചേതന കോളജിലെ ബിരുദ വിദ്യാർഥിയായ ചീയാരം സ്വദേശി അമലാണ് ആക്രമണത്തിന് ഇരയായത്. മർദനത്തിനിടെ അമലിനെ കല്ലുകൊണ്ട് തലയ്ക്കടിക്കുന്ന ദൃശ്യങ്ങളും പുറത്തുവന്നിട്ടുണ്ട്.

സഹപാഠികൾക്കൊപ്പം ഭക്ഷണം കഴിക്കാൻ ബൈക്കിൽ പുറത്തിറങ്ങിയപ്പോഴാണ് സംഭവം. പിറകിലിരുന്ന പെൺകുട്ടി ബൈക്കിൽ നിന്ന് താഴെ വീണപ്പോൾ നാട്ടുകാരിൽ ചിലർ ചോദ്യം ചെയ്യുകയും അമലിനെ കല്ലുകൊണ്ട് തലയ്ക്ക് ഇടിക്കുകയും ചെയ്തു.

ബൈക്കിൽ പെൺകുട്ടിയുമൊത്ത് സഞ്ചരിച്ചത് ചോദ്യം ചെയ്തായിരുന്നു മർദനം. ധരിച്ചിരുന്ന വസ്ത്രത്തിന്‍റെ പേരിലും ആക്രമിച്ചെന്ന് അമൽ പറയുന്നു. വിദ്യാര്‍ഥിയുടെ പരാതിയിൽ ഒല്ലൂർ പൊലീസ് കേസെടുത്തു. അതേസമയം അമൽ മർദിച്ചെന്ന നാട്ടുകാരുടെ പരാതിയിൽ വിദ്യാര്‍ഥിക്കെതിരെയും കേസെടുത്തിട്ടുണ്ട്.