തൃശൂരിൽ കെഎസ്‌ആർടിസി സ്വിഫ്റ്റ് ബസ് അപകടത്തിൽപ്പെട്ടു; 15 പേർക്ക് പരിക്ക്

കൊല്ലത്ത് നിന്ന് പഴനിക്ക് പോവുകയായിരുന്ന ബസാണ് അപകടത്തിൽപ്പെട്ടത്. തൃശൂർ പട്ടിക്കാട് മേൽപ്പാതയ്ക്ക് സമീപത്തുവച്ചാണ് അപകടം.

തൃശൂർ: കെഎസ്‌ആർടിസി സ്വിഫ്റ്റ് ബസ് അപകടത്തിൽപ്പെട്ട് 15 പേർക്ക് പരിക്ക്. തൃശൂർ പട്ടിക്കാട് മേൽപ്പാതയ്ക്ക് സമീപത്തുവച്ചാണ് അപകടമുണ്ടായത്. കൊല്ലത്തുനിന്നും പഴനിക്ക് പോവുകയായിരുന്ന കെഎസ്ആർടിസി സ്വിഫ്റ്റ് എയർബസാണ് അപകടത്തിൽപ്പെട്ടത്.

ഇന്നലെ അർധരാത്രി 12:30 ഓടെയാണ് അപകടം നടന്നത്. ബസ് മേൽപ്പാത ഇറങ്ങുന്നതിനിടെ നിയന്ത്രണം വിട്ട് ഡിവൈഡറിൽ ഇടിച്ചു കയറുകയായിരുന്നു. ഇടിയുടെ ആഘാതത്തിൽ ഇലക്‌ട്രിക് ലൈറ്റ് പോസ്‌റ്റുകൾ തകർത്തു.

അപകടത്തിൽ പരിക്കേറ്റവരെ തൃശൂർ ജില്ല ആശുപത്രിയിൽ പ്രവേശിപ്പിച്ചു. പീച്ചി പൊലീസ് സ്ഥലത്തെത്തി മേൽ നടപടികൾ സ്വീകരിച്ചു.