വിശുദ്ധ പ്രഖ്യാപന മുഹൂർത്തം; പ്രാർഥനയോടെ വിശ്വാസി സമൂഹം

അൽഫോൻസാമ്മക്കും ചാവറയച്ചനും എവുപ്രാസ്യക്കും പിന്നാലെ സീറോമലബാർ സഭയിൽ ഒരു പുണ്യവതി കൂടി ഇന്ന് പിറവിയെടുക്കും. ചരിത്ര മുഹൂർത്തം നെഞ്ചിലേറ്റാനുള്ള അവസാന ഘട്ട ഒരുക്കങ്ങളിലാണ് തൃശൂർ പുത്തൻചിറ ഗ്രാമവും വിശ്വാസികളും.

തൃശൂർ : മറിയം ത്രേസിയയെ വിശുദ്ധയായി പ്രഖ്യാപിക്കുന്ന ചരിത്ര മുഹൂർത്തതിനായി തൃശൂർ കുഴിക്കാട്ടുശ്ശേരി മറിയം ത്രേസ്യ തീർത്ഥാടന കേന്ദ്രം ഒരുങ്ങി. ഇന്ന് വത്തിക്കാനിൽ ഫ്രാൻസിസ് മാർപാപ്പ മറിയം ത്രേസ്യയെ പുണ്യവതിയായി പ്രഖ്യാപിക്കുമ്പോൾ അത് കേരള സഭയുടെയും ഭാരതസഭയുടെയും അഭിമാന മുഹൂർത്തമായിരിക്കും. അൽഫോൻസാമ്മക്കും ചാവറയച്ചനും എവുപ്രാസ്യക്കും പിന്നാലെ സീറോമലബാർ സഭയിൽ ഒരു പുണ്യവതി കൂടി പിറവിയെടുക്കും. ഫ്രാൻസിസ് മാർപ്പാപ്പ അഞ്ചു വാഴ്ത്തപ്പെട്ടവരെ ഒരുമിച്ചു വിശുദ്ധരായി പ്രഖ്യാപിക്കുമ്പോൾ മൂന്നാമതായി ആ പേര് കൂടി മുഴങ്ങും "സെന്‍റ് മദർ മറിയം ത്രേസ്യ". ആ ചരിത്ര മുഹൂർത്തം നെഞ്ചിലേറ്റാനുള്ള അവസാന ഘട്ട ഒരുക്കങ്ങളിലാണ് തൃശൂർ പുത്തൻചിറ ഗ്രാമവും വിശ്വാസികളും.

ഇന്ന് ഉച്ചക്ക് ഇന്ത്യൻ സമയം 1.30 ന് ഫ്രാൻസിസ് മാർപാപ്പയുടെ മുഖ്യകാര്‍മികത്തിൽ വത്തിക്കാനിൽ നടക്കുന്ന ചടങ്ങിൽ ഇരിങ്ങാലക്കുട രൂപത ബിഷപ്പ് മാർ പോളി കണ്ണൂക്കാടൻ സഹകാര്‍മികനാകും. ത്രേസ്യയുടെ ഭൗതിക ശരീരം അടക്കം ചെയ്‌ത കുഴിക്കാട്ടുശ്ശേരിയിലെ തീർത്ഥാടനകേന്ദ്രത്തിൽ ഇതിനോടനുബന്ധിച്ച് നിരവധി ആഘോഷപരിപാടികളാണ് സംഘടിപ്പിച്ചിട്ടുള്ളത്.