കുട്ടികൾക്ക് നേരെ നഗ്നതാപ്രദർശനം; നടന്‍ ശ്രീജിത്ത് രവി അറസ്റ്റിൽ

പോക്‌സോ നിയമപ്രകാരമുള്ള അറസ്റ്റ് കുട്ടികൾ നൽകിയ പരാതിയുടെ അടിസ്ഥാനത്തിൽ

തൃശൂർ:കുട്ടികൾക്ക് മുന്നിൽ നഗ്നതാപ്രദർശനം നടത്തിയെന്ന പരാതിയിൽ നടൻ ശ്രീജിത്ത് രവിയെ അറസ്റ്റ് ചെയ്‌തു. തൃശൂർ ടൗൺ വെസ്റ്റ് പൊലീസാണ് ശ്രീജിത്തിന്‍റെ അറസ്റ്റ് രേഖപ്പെടുത്തിയത്. കുട്ടികള്‍ക്കെതിരെയുള്ള ലൈംഗിക ആക്രമണം തടയുന്നതിനുള്ള പോക്സോ നിയമപ്രകാരമാണ് കേസ് രജിസ്റ്റർ ചെയ്‌തത്.

മൂന്ന് ദിവസം മുമ്പ് തൃശൂര്‍ അയ്യന്തോളിലെ എസ്.എന്‍ പാർക്കിന് സമീപമാണ് കേസിനാസ്‌പദമായ സംഭവമുണ്ടായത്. കുട്ടികള്‍ നൽകിയ പരാതിയിലാണ് അറസ്റ്റ്. സമാനമായ കേസിൽ മുമ്പ് പാലക്കാട് നിന്നും ശ്രീജിത്ത് രവി പിടിയിലായിട്ടുണ്ട്.

14ഉം ഒമ്പതും വയസുള്ള കുട്ടികള്‍ക്ക് മുന്നിലായിരുന്നു ശ്രീജിത്ത് രവിയുടെ നഗ്നതാപ്രദര്‍ശനം. കറുത്ത കാറിലെത്തിയയാള്‍ എന്നാണ് കുട്ടികള്‍ മൊഴി നല്‍കിയത്. ആളെ പരിചയമുണ്ടെന്നും കുട്ടികൾ പൊലീസിനോട് പറഞ്ഞിരുന്നു.

സമീപത്തെ സിസിടിവി ദൃശ്യങ്ങള്‍ കേന്ദ്രീകരിച്ചായിരുന്നു അന്വേഷണം. തുടര്‍ന്ന് ലഭിച്ച ഇയാളുടെ കാറിന്‍റെ വിവരങ്ങളുടെ അടിസ്ഥാനത്തിൽ നടത്തിയ അന്വേഷണത്തിലാണ് പ്രതി പിടിയിലായത്. ശ്രീജിത്ത് രവിയെ കുട്ടികൾ തിരിച്ചറിഞ്ഞതായി പൊലീസ് അറിയിച്ചു.