തിരുവനന്തപുരം : പൂന്തുറയിൽ യുവതിയെ വീടുകയറി ആക്രമിച്ച സംഭവത്തിലെ പ്രതികളിലൊരാൾ പിടിയിൽ. മണക്കാട് സ്വദേശി സുധീർ ആണ് അറസ്റ്റിലായത്. ഇയാളുടെ സഹോദരൻ നൗഷാദ് ഒളിവിലാണ്. ഞായറാഴ്ച പൂന്തുറയിലുള്ള ആമിന എന്ന യുവതിയെയാണ് അയൽവാസികളായ സുധീറും നൗഷാദും വീടുകയറി മർദിച്ചത്.
ആമിനയെ തള്ളി നിലത്തിടുകയും തുടർന്ന് മതിലിൽ ചേർത്തുനിർത്തി മര്‍ദിക്കുകയും ചെയ്യുന്ന ദൃശ്യങ്ങൾ പുറത്തുവന്നിട്ടുണ്ട്. ആമിനയുടെ വീടിന്‍റെ താഴത്തെ നില സ്വകാര്യ സ്ഥാപനത്തിലെ ജീവനക്കാർക്ക് വാടകയ്ക്ക് നൽകിയിരുന്നു.