കാര്‍ഷിക സമൃദ്ധിയുടെ ഓര്‍മ പുതുക്കി ഇന്ന് വിഷു. മനസില്‍ കൊന്നപ്പൂ തിളക്കവുമായി ഐശ്വര്യത്തിന്‍റെ നല്ല നാളുകളെ വരവേല്‍ക്കാന്‍ ഒരുങ്ങുകയാണ് മലയാളികള്‍. കണിയൊരുക്കിയും കൈനീട്ടം നല്‍കിയും പുതു വസ്‌ത്രങ്ങള്‍ അണിഞ്ഞും സമൃദ്ധമായ സദ്യയൊരുക്കിയും ആഘോഷത്തിലാണ് മലയാള നാട്.
കൊന്നപ്പൂവും കൃഷ്‌ണ വിഗ്രഹവും കണിവെള്ളരിയും നാളികേരവും മറ്റ് ഫലമൂലാദികളും കൊണ്ട് സമ്പന്നമായ വിഷുക്കണി കണ്ടുകൊണ്ടാണ് വിഷുപ്പുലരിയെ വരവേല്‍ക്കുന്നത്. വരുന്ന വര്‍ഷത്തെ ഫലം വിഷുക്കണിയെ ആശ്രയിച്ചിരിക്കുമെന്നാണ് വിശ്വാസം. കാര്‍ഷിക സമൃദ്ധിയുടെ ഓര്‍മപ്പെടുത്തലായി ഓട്ടുരുളിയില്‍ ഒരുക്കുന്ന വിഷുക്കണി കണ്ടുകഴിഞ്ഞാല്‍ പിന്നെ കൈനീട്ടമാണ്. കുടുംബത്തിലെ മുതിര്‍ന്നവരില്‍ നിന്ന് ലഭിക്കുന്ന കൈനീട്ടം യഥാര്‍ഥത്തില്‍ അവരുടെ അനുഗ്രഹം കൂടിയാണ്.