തിരുവനന്തപുരം:നിയമസഭ സമ്മേളനം വെട്ടി ചുരുക്കേണ്ടി വന്നത് ചർച്ചയ്ക്കില്ലെന്ന മുഖ്യമന്ത്രിയുടെ ധിക്കാര പൂർവ്വമായ നിലപാട് കാരണമെന്ന് പ്രതിപക്ഷ നേതാവ് വി.ഡി സതീശൻ. പ്രതിപക്ഷവുമായി ചർച്ചയ്ക്കില്ലെന്ന ധാർഷ്ട്യവും ധിക്കാരപരവുമായ നിലപാടാണ് മുഖ്യമന്ത്രി സ്വീകരിച്ചത്. ഇത് ഒരു തരത്തിലും അംഗീകരിക്കാൻ കഴിയില്ലെന്നും അദ്ദേഹം കൂട്ടിച്ചേര്‍ത്തു.
പ്രതിപക്ഷത്തിൻ്റെ അവകാശങ്ങൾ കവരാനാണ് ശ്രമം നടന്നത്. സർക്കാറിൻ്റെ കെടുകാര്യസ്ഥത പുറത്ത് വരുമെന്നത് കൊണ്ടാണ് അടിയന്തര പ്രമേയ നോട്ടിസ് അടക്കം പരിഗണിക്കാതിരുന്നത്. സർക്കാറിന് 25,000 കോടി നഷ്‌ടപ്പെട്ട ഐജിഎസ്‌ടി വിഷയം ചർച്ച ചെയ്യാൻ അനുവദിച്ചില്ല. കെഎസ്ആർടിസി, ബ്രഹ്മപുരം സ്ത്രീ സുരക്ഷ ഇതൊന്നും ചർച്ച ചെയ്യാൻ പാടില്ലെന്നാണ് സർക്കാർ പറയുന്നതെന്നും അദ്ദേഹം പറഞ്ഞു.
പ്രതിപക്ഷം നടത്തിയത് ധീരമായ പോരാട്ടം:സംസ്ഥാനസർക്കാറിൻ്റെ നിഷേധാത്മക നിലപാടിൽ അവകാശങ്ങൾ ബലികഴിക്കാതെയുള്ള പോരാട്ടമാണ് പ്രതിപക്ഷം നടത്തിയതെന്ന് പ്രതിപക്ഷ നേതാവ് വി.ഡി സതീശൻ പറഞ്ഞു. സഭയിൽ എന്ത് നടക്കുമെന്ന് താൻ തീരുമാനിക്കുമെന്ന മുഖ്യമന്ത്രിയുടെ ധിക്കാരത്തിന് മുന്നിൽ കീഴടങ്ങില്ല. അതിനായുള്ള ധീരമായ പോരാട്ടമാണ് സഭയിൽ നടന്നത്. കേന്ദ്രത്തിലെ സംഘ് പരിവാർ സർക്കാറിൻ്റെ അതേ നിലപാടാണ് പിണറായി സർക്കാറും സ്വീകരിക്കുന്നത്. എംഎൽഎമാർക്കെതിരെ കള്ള കേസെടുക്കുകയാണ്. അവർ ജയിലിൽ പോകാൻ തയാറാണ്. അങ്ങനെ എംഎൽഎമാരെ ജയിലിലാക്കിയാൽ കേരളം വെറുതെയിരിക്കില്ല. നിയമസഭയ്ക്ക് പുറത്തും സർക്കാരിനെതിരായ പോരാട്ടം തുടരുമെന്നും അദ്ദേഹം പറഞ്ഞു.
ഇഎംഎസും വിഎസും നടുത്തളത്തിൽ സത്യഗ്രഹം നടത്തിയിട്ടുണ്ട്:സ്‌പീക്കറും മന്ത്രിമാരും നടുത്തളത്തിൽ സത്യഗ്രഹം ചെയ്‌ത പ്രതിപക്ഷ നേതാവിനെയും അംഗങ്ങളെയും നിരന്തരം അപമാനിച്ചതായി വി.ഡി സതീശൻ. എന്നാൽ സഭയിൽ ഇഎംഎസാണ് ആദ്യം സത്യഗ്രഹം നടത്തിയത്. വിഎസ് അച്യുതാനന്ദനും നടുത്തളത്തിൽ സത്യഗ്രഹം നടത്തിയിട്ടുണ്ട്. ഇതെല്ലാം ഓർമിച്ച് വേണം പ്രതിപക്ഷ നേതാവിനെ അടക്കമുള്ളവരെ അപമാനിച്ച് പ്രസ്‌താവനകള്‍ നടത്താനെന്നും സതീശൻ പറഞ്ഞു. സ്‌പീക്കറും മറ്റ് മന്ത്രിമാരും പരാമർശങ്ങൾ പിൻവലിക്കണമെന്നും വിഡി സതീശന്‍ ആവശ്യപ്പെട്ടു.