'സംസ്ഥാന സാമ്പത്തിക സ്ഥിതി അപകടത്തില്‍, വിവാദങ്ങള്‍ ഇത് മറച്ചുവയ്‌ക്കാന്‍'; സജി ചെറിയാനെതിരെ കൂടുതല്‍ സമരമെന്ന് വിഡി സതീശന്‍

സംസ്ഥാനത്തിന്‍റെ സാമ്പത്തിക സ്ഥിതിയെക്കുറിച്ചും സജി ചെറിയാന്‍റെ സത്യപ്രതിജ്ഞയെക്കുറിച്ചും സംസാരിച്ചതിന് പുറമെ ബഫര്‍ സോണ്‍ വിഷയത്തിലും സര്‍ക്കാരിനെതിരെ രൂക്ഷമായ പ്രതികരണമാണ് പ്രതിപക്ഷ നേതാവ് നടത്തിയത്

തിരുവനന്തപുരം:സംസ്ഥാനത്തെ സാമ്പത്തിക സ്ഥിതി അപകടകരമായ അവസ്ഥയിലെന്ന് പ്രതിപക്ഷ നേതാവ് വിഡി സതീശൻ. ഇത് മറച്ചുവയ്ക്കാൻ സർക്കാർ വിവാദങ്ങളുണ്ടാക്കുകയാണ്. സാധാരണക്കാരെയും കർഷകരെയും സഹായിക്കാൻ സർക്കാറിന് ഒന്നും ചെയ്യാൻ കഴിയുന്നില്ലെന്നും അദ്ദേഹം ആരോപിച്ചു.

ശമ്പളം കൊടുക്കാൻ പോലും ബുദ്ധിമുട്ടുന്ന അവസ്ഥയാണ്. എന്നാൽ, ഇത് പുറത്തുപറയാതെ എല്ലാം മറച്ചുവയ്ക്കുകയാണ് സർക്കാർ ചെയ്യുന്നത്. സംസ്ഥാനത്തെ ധനം സംബന്ധിച്ച് ധവളപത്രം ഇറക്കാൻ സർക്കാർ തയ്യാറാകണം. 1992 - 2000 കാലത്തെ സാമ്പത്തിക പ്രതിസന്ധിയെക്കാൾ മോശമായ അവസ്ഥയാണ് ഇപ്പോഴുള്ളത്. യുഡിഎഫ് ഇറക്കിയ ധവളപത്രത്തിലെ മുന്നറിയിപ്പ് അതുപോലെ സംഭവിക്കുകയാണ്. ബഫർ സോൺ വിഷയത്തിലും ജനങ്ങളുടെ ആശങ്ക പരിഹരിക്കാൻ സർക്കാർ ഒന്നും ചെയ്യുന്നില്ല.

പ്രസിദ്ധീകരിച്ച ഭൂപടം സംബന്ധിച്ച 26,000 പരാതികൾ ലഭിച്ചിട്ടും 18 എണ്ണം മാത്രമാണ് പരിശോധിച്ചത്. ഈ മേഖലയിലെ ജനങ്ങൾ ആകെ പരിഭ്രാന്തിയിലാണ്. ഇക്കാര്യങ്ങളിൽ നിന്ന് ജനശ്രദ്ധ തിരിക്കുന്നതിനാണ് ഗവർണർ സർക്കാർ പോര് എന്ന തരത്തിൽ വിവാദങ്ങളുണ്ടാക്കുന്നത്. ഇരുവരും തമ്മിൽ യാതൊരു പ്രശ്‌നങ്ങളും ഇല്ല എന്നതിന് തെളിവാണ് സജി ചെറിയാന്‍റെ ഇന്നത്തെ സത്യപ്രതിജ്ഞ. സജി ചെറിയാന്‍റെ സത്യപ്രതിജ്ഞയില്‍ കൂടുതൽ സമരപരിപാടികൾ യുഡിഎഫ് നേതൃത്വം ആലോചിച്ച് തീരുമാനിക്കുമെന്നും സതീശൻ പറഞ്ഞു.