തിരുവനന്തപുരം: നിയമസഭയിൽ കെ.കെ രമയെ എം.എം മണി അധിക്ഷേപിച്ച സംഭവത്തിൽ മുഖ്യമന്ത്രിക്കെതിരെ രൂക്ഷ വിമര്‍ശഷനവുമായി പ്രതിപക്ഷ നേതാവ് വി ഡി സതീശൻ. കെ.കെ രമ വിധവയായത് പാർട്ടി കോടതിയുടെ വിധിയിലാണ്. ആ വിധി പ്രഖ്യാപിച്ച ജഡ്‌ജിയാണ് ഇന്ന് കേരളം ഭരിക്കുന്ന മുഖ്യമന്ത്രി പിണറായി വിജയനെന്നും വി ഡി സതീശൻ പറഞ്ഞു.
ചോരയുടെ കറ ഇപ്പോഴും മുഖ്യമന്ത്രിയുടെ കൈകളിലുണ്ട്. കേരളത്തിൽ വിധവകളെ ഉണ്ടാക്കുന്ന പാർട്ടിയാണ് സിപിഎം. നിയമസഭയിൽ കെ.കെ രമയെ അധിക്ഷേപിച്ച എം.എം മണിയെ തിരുത്താൻ മുഖ്യമന്ത്രി തയ്യാറായില്ല.
ക്രൂരമായ പ്രതികരണമാണ് മുഖ്യമന്ത്രിയുടെ ഭാഗത്തുനിന്നുണ്ടായതെന്നും വി ഡി സതീശൻ പറഞ്ഞു. കെ.കെ രമയ്‌ക്കെതിരായ എം.എം മണിയുടെ പരാമർശം പിൻവലിച്ച് മാപ്പ് പറയണമെന്നാവശ്യപ്പെട്ട് നിയമസഭയിൽ നടത്തിയ പ്രതിഷേധത്തിനു ശേഷം പുറത്ത് മാധ്യമങ്ങളോട് സംസാരിക്കുകയായിരുന്നു വി ഡി സതീശൻ.
