തിരുവനന്തപുരം:കെ.എസ് ശബരിനാഥനെ ജയിലില്‍ അടയ്ക്കാന്‍ ഗൂഢാലോചന നടത്തിയ മുഖ്യമന്ത്രിക്കേറ്റ കനത്ത തിരിച്ചടിയാണ് കോടതിയുടെ ജാമ്യവിധിയെന്ന് പ്രതിപക്ഷ നേതാവ് വി.ഡി സതീശന്‍. രാഷ്ട്രീയപ്രേരിതമായാണ് കള്ളക്കേസില്‍ കുടുക്കിയത്. മുഖ്യമന്ത്രിക്കും അദ്ദേഹത്തിന്‍റെ ഓഫിസിനും കിട്ടിയ തിരിച്ചടിയാണ് കോടതി ഉത്തരവെന്നും അദ്ദേഹം പറഞ്ഞു.
കെ.എസ് ശബരിനാഥന് ജാമ്യം ലഭിച്ചതില്‍ പ്രതികരിച്ച് പ്രതിപക്ഷ നേതാവ്
ശബരിനാഥനെ ജയിലില്‍ അടയ്ക്കാന്‍ വേണ്ടിയുള്ള ഗൂഢാലോചനയാണ് മുഖ്യമന്ത്രിയുടെ ഓഫിസില്‍ നടന്നത്. വിമാനത്തില്‍ നടന്നത് വധശ്രമമല്ല, പ്രതിഷേധം മാത്രമായിരുന്നെന്ന് യൂത്ത് കോണ്‍ഗ്രസ് പ്രവര്‍ത്തകര്‍ക്ക് ജാമ്യം നല്‍കിക്കൊണ്ടുള്ള ഉത്തരവില്‍ ഹൈക്കോടതി വ്യക്തമാക്കിയിരുന്നു. എന്നിട്ടും, വധശ്രമം ചുമത്തി ശബരിനാഥിനെ ജയിലില്‍ അടയ്ക്കാനുള്ള ഗൂഢാലോചനയാണ് ജാമ്യം ലഭിച്ചതോടെ തകര്‍ന്നുപോയത്. സ്വര്‍ണകള്ളക്കടത്ത് കേസുമായി ബന്ധപ്പെട്ട സമരം ഇനിയും തുടരും.