സമസ്‌ത നേതാവ്‌ വിദ്യാര്‍ഥിനിയെ അപമാനിച്ച സംഭവം; പ്രതികരിക്കാന്‍ മുഖ്യമന്ത്രിക്ക് ഭയമെന്ന് വി.മുരളീധരന്‍

10-ാം ക്ലാസ്‌ വിദ്യാര്‍ഥിനിയെ പൊതുവേദിയില്‍ അപമാനിച്ചിട്ടും മുഖ്യമന്ത്രിയോ വിദ്യാഭ്യാസ മന്ത്രിയോ പ്രതികരിച്ചിട്ടില്ലെന്ന് കേന്ദ്രമന്ത്രി വി.മുരളീധരന്‍ ആരോപിച്ചു.

തിരുവനന്തപുരം:പത്താം ക്ലാസ്‌ വിദ്യാര്‍ഥിനിയെ പൊതിവേദിയില്‍സമസ്‌ത നേതാവ്‌ അപമാനിച്ച സംഭവത്തില്‍ പ്രതികരിക്കാൻ മുഖ്യമന്ത്രി പിണറായി വിജയന് ഭയമാണെന്ന് കേന്ദ്ര മന്ത്രി വി.മുരളീധരന്‍. സംഭവത്തില്‍ എന്ത്‌ അന്വേഷണമാണ് നടക്കുന്നതെന്ന് മുഖ്യമന്ത്രി വ്യക്തമാക്കണമെന്നും അദ്ദേഹം ആവശ്യപ്പെട്ടു.

സ്വയം അപ്പൂപ്പനെന്ന് വിശേഷിപ്പിക്കുന്ന വിദ്യാഭ്യാസ മന്ത്രി വി.ശിവന്‍കുട്ടിയും സമസ്‌ത വിഷയത്തില്‍ ഇതുവരെ പ്രതികരച്ചിട്ടില്ല. ഒരു വിദ്യാര്‍ഥിനിയെ പൊതുവേദിയില്‍ പരസ്യമായി അപമാനിച്ചിട്ടും ഭരണപ്രതിപക്ഷങ്ങള്‍ പ്രതികരിക്കാന്‍ വൈകിയെന്നും മുരളീധരന്‍ ആരോപിച്ചു.

സംസ്ഥാനം നേരിടുന്ന സാമ്പത്തിക പ്രതിസന്ധി സര്‍ക്കാരിന്‍റെ കെടുകാര്യസ്ഥത കൊണ്ടാണെന്നും കേന്ദ്ര മന്ത്രി കുറ്റപ്പെടുത്തി. കേന്ദ്രത്തെ പഴിചാരി രക്ഷപെടാനാണ് സര്‍ക്കാര്‍ ശ്രമിക്കുന്നതെന്നും ഒരുവശത്ത് ധൂർത്തടിച്ച്, മറുവശത്ത് പണമില്ലെന്ന് പറയുകയുമാണ് സര്‍ക്കാർ ചെയ്യുന്നതെന്നും മുരളീധരന്‍ പറഞ്ഞു.

അതേസമയം തൃക്കാക്കര ഉപതെരഞ്ഞെടുപ്പ് വന്നപ്പോള്‍ വലിയ വികസനമെന്ന് ആഘോഷിച്ച സില്‍വര്‍ ലൈന്‍ പദ്ധതിയുടെ കല്ലിടല്‍ നിര്‍ത്തിയതെന്തിനാണെന്നും അദ്ദേഹം ചോദിച്ചു.