സജി ചെറിയാൻ്റെ വിദേശയാത്ര മുടങ്ങാൻ കാരണം സർക്കാരിൻ്റെ പിടിപ്പില്ലായ്‌മയും കഴിവുകേടും : വി മുരളീധരന്‍

യാത്രയ്‌ക്ക് വേണ്ടി എന്തുകൊണ്ടാണ് മൂന്ന് നാല് ദിവസം മുന്‍പ് അപേക്ഷ സമര്‍പ്പിക്കാന്‍ സാധിക്കാതിരുന്നതെന്ന് വി മുരളീധരന്‍

തിരുവനന്തപുരം : മന്ത്രി സജി ചെറിയാൻ്റെ വിദേശയാത്ര മുടങ്ങാൻ കാരണം സംസ്ഥാന സർക്കാരിൻ്റെ പിടിപ്പില്ലായ്‌മയും കഴിവുകേടുമാണെന്ന് കേന്ദ്രമന്ത്രി വി മുരളീധരൻ. മന്ത്രിയുടെ ഓഫിസ് വിദേശയാത്ര സംബന്ധിച്ച് കേന്ദ്രാനുമതിക്കായി അപേക്ഷ സമർപ്പിച്ചത് പത്താം തീയതിയാണ്. 11 ന് തന്നെ അപേക്ഷ പരിശോധിക്കുകയും 12 ന് വിദേശയാത്രയ്ക്ക് അനുമതി നൽകുകയും ചെയ്‌തു. അപേക്ഷയിൽ പറയുന്നത് 12 മുതൽ യുഎഇയിലും ബഹ്റൈനിലും പരിപാടി ഉണ്ടെന്നാണ്. ഇക്കാര്യം അദ്ദേഹത്തിൻ്റെ ഓഫിസ് ഒരു ദിവസം മുൻപാണോ അറിഞ്ഞതെന്നും മുരളീധരൻ ചോദിച്ചു.

എന്തുകൊണ്ടാണ് യാത്രയ്ക്ക് വേണ്ടി മൂന്ന് നാല് ദിവസം മുൻപ് അപേക്ഷ സമർപ്പിക്കാൻ സാധിക്കാതിരുന്നതെന്നും അദ്ദേഹം ചോദിച്ചു. ഇത്രയും കഴിവില്ലാത്ത ആളുകളെ വച്ച് എങ്ങനെ സർക്കാർ നടത്തിക്കൊണ്ടുപോകുമെന്നത് മുഖ്യമന്ത്രിയും സർക്കാരിന് നേതൃത്വം നൽകുന്നവരുമാണ് തീരുമാനമെടുക്കേണ്ടത്. രാജ്യത്തെ ഏത് മന്ത്രിയും എംപിയും വിദേശത്ത് പോകുമ്പോൾ കേന്ദ്രാനുമതി വാങ്ങണമെന്നുള്ളത് ചട്ടമാണെന്നും മുരളീധരൻ കൂട്ടിച്ചേർത്തു. ഇതോടൊപ്പം അബുദാബി നിക്ഷേപക സംഗമത്തിൽ പങ്കെടുക്കുന്നതിന് മുഖ്യമന്ത്രിക്കും മന്ത്രിമാർക്കും കേന്ദ്രം നേരത്തെ അനുമതി നിഷേധിച്ച സംഭവത്തിലും മുരളീധരൻ പ്രതികരിച്ചു.

അബുദാബി ഇൻവെസ്റ്റ്‌മെന്‍റ്‌ ഫോറം വിവിധ രാജ്യങ്ങളിൽ നിന്നുള്ള നിക്ഷേപം അബുദാബിയിൽ കൊണ്ടുവരുന്നതിനുള്ള സമ്മേളനമാണ്. അവിടെ മുഖ്യമന്ത്രിക്ക് സംസാരിക്കാനോ പ്രസംഗിക്കാനോ റോളുള്ളതായി തനിക്കറിയില്ല. പല സംസ്ഥാനങ്ങളിൽ നിന്നും മുഖ്യമന്ത്രിമാർ ഈ പരിപാടിയിൽ പങ്കെടുക്കുന്നതിന് അനുമതി തേടിയിരുന്നു. ആർക്കും അനുമതി നൽകിയിട്ടില്ല.

കേരളത്തിലെ മുഴുവൻ ജനങ്ങളുടെയും പ്രതിനിധിയാണ് മുഖ്യമന്ത്രി. അങ്ങനെയുള്ള ഒരാൾ പോകുമ്പോൾ അതിന് ഉതകുന്ന വേദിയിലായിരിക്കണം പോകേണ്ടത്. സംസ്ഥാനത്തിനും രാജ്യത്തിനും അപമാനമുണ്ടാക്കുന്ന തരത്തിൽ ഉള്ള ഒരു പങ്കാളിത്തം ഉണ്ടാകരുത് എന്ന ഉദ്ദേശത്തോടെയാണ് അനുമതി നിഷേധിച്ചതെന്നും മുരളീധരൻ വ്യക്തമാക്കി. യുഎസ്, ക്യൂബ എന്നീ രാജ്യങ്ങൾ സന്ദർശിക്കുന്നതിന് മുഖ്യമന്ത്രിയും സംഘവും സമർപ്പിച്ചിരിക്കുന്ന അപേക്ഷ പരിശോധിക്കട്ടെയെന്നും അദ്ദേഹം കൂട്ടിച്ചേർത്തു.

അതേസമയം കേന്ദ്രാനുമതി വൈകിയതിനെ തുടർന്ന് സജി ചെറിയാൻ യാത്ര റദ്ദാക്കിയിരുന്നു. യുഎഇയിലെ രണ്ടുനഗരങ്ങളില്‍ നടക്കുന്ന മലയാളം മിഷന്‍റെ പരിപാടികളില്‍ പങ്കെടുക്കുന്നതിന് കഴിഞ്ഞ ബുധനാഴ്‌ച പോകാനായിരുന്നു തീരുമാനം. വിമാനത്താവളത്തിലെത്തിയെങ്കിലും അവസാന നിമിഷവും അനുമതി ലഭിക്കാത്തതിനെ തുടർന്ന് തിരിച്ചുപോരുകയായിരുന്നു. പരിപാടിയിൽ പങ്കെടുക്കുന്നതിനായുള്ള അവസാന വിമാനത്തിന്‍റെയും സമയത്തിനുശേഷമാണ് കേന്ദ്രാനുമതി നൽകിയത്. ഇതിന് പിന്നാലെയാണ് മന്ത്രി യാത്ര റദ്ദാക്കിയത്.