തിരുവനന്തപുരം : ഓണസദ്യ മാലിന്യക്കുപ്പയില്‍ എറിഞ്ഞ ശുചീകരണ തൊഴിലാളികൾക്കെതിരായ തിരുവനന്തപുരം നഗരസഭയുടെ നടപടിക്കെതിരെ വ്യാപക പ്രതിഷേധം. സംഭവത്തിന്‍റെ ദൃശ്യങ്ങൾ വൈറലായതോടെ ഹെൽത്ത് ഇൻസ്പെക്‌ടറുടേയും ഹെൽത്ത് സൂപ്പര്‍വൈസറുടേയും റിപ്പോര്‍ട്ടിന്‍റെ അടിസ്ഥാനത്തിൽ ഏഴ് സ്ഥിരം തൊഴിലാളികളെ മേയര്‍ ആര്യ രാജേന്ദ്രൻ സസ്പെൻഡ് ചെയ്‌തിരുന്നു. നാല് താത്കാലികക്കാരെ പിരിച്ചുവിട്ടു.
ഇതിനെതിരെയാണ് പ്രതിഷേധം ശക്തമാകുന്നത്. നടപടി പിൻവലിക്കണമെന്ന് സിഐടിയുവും ഐഎൻടിയുസിയും ആവശ്യപ്പെട്ടു. സിഐടിയു മേയർക്ക് കത്ത് നൽകി. മേയറുടെ നടപടിക്കെതിരെ സമൂഹ മാധ്യമങ്ങളിൽ വ്യാപക പ്രതിഷേധമാണ് ഉയരുന്നത്. പ്രതിഷേധിക്കാനുള്ള തൊഴിലാളികളുടെ അവകാശത്തെ അടിച്ചമർത്തി എന്നാണ് വിമർശനം. കഴിഞ്ഞ ശനിയാഴ്‌ച ആയിരുന്നു സംഭവം.