പണിമുടക്ക് അംഗീകരിക്കാനാവില്ല, കൈയും കെട്ടി നോക്കിനിൽക്കില്ല: ആന്‍റണി രാജു

ഇനി ശമ്പള പരിഷ്‌കരണ ചർച്ചകൾക്ക് സർക്കാർ മുൻകൈ എടുക്കില്ലെന്ന് ഗതാഗത വകുപ്പ് മന്ത്രി ആന്‍റണി രാജു വ്യക്തമാക്കി.

തിരുവനന്തപുരം: കെഎസ്ആർടിസി പണിമുടക്കിനെതിരെ രൂക്ഷവിമർശനവുമായി ഗതാഗത മന്ത്രി ആന്‍റണി രാജു. കൊവിഡ് പ്രതിസന്ധി മൂലം ജനങ്ങൾ ബുദ്ധിമുട്ട് അനുഭവിക്കുന്ന കാലത്ത് ജനങ്ങളെ ബന്ധികളാക്കി സമരം നടത്തുന്നത് ഒരു തരത്തിലും അംഗീകരിക്കാൻ കഴിയില്ലെന്ന് മന്ത്രി പറഞ്ഞു. 30 കോടിയുടെ അധിക ബാധ്യത വരുന്ന ശമ്പള പരിഷ്‌കരണം ചർച്ച ചെയ്യാൻ 30 മണിക്കൂർ സമയം പോലും സർക്കാരിന് നൽകിയില്ലെന്നും മന്ത്രി പറഞ്ഞു.

80 കോടി രൂപയാണ് ശമ്പളം നൽകാൻ സർക്കാർ ചെലവഴിക്കുന്നത്. ഒരു രൂപ പോലും വരുമാനം ഇല്ലാത്ത ഘട്ടത്തിൽ പോലും സർക്കാർ കെഎസ്ആർടിസി ജീവനക്കാർക്ക് ശമ്പളം നൽകിയിരുന്നു. ഇനി ശമ്പള പരിഷ്‌കരണ ചർച്ചകൾക്ക് സർക്കാർ മുൻകൈ എടുക്കില്ലെന്നും മന്ത്രി വ്യക്തമാക്കി.

സർക്കാരിനെ മുൾമുനയിൽ നിർത്തുന്നത് ശരിയാണോ എന്ന് യൂണിയനുകൾ ആലോചിക്കണം. ഇത്തരം പ്രവണതകൾ കൈയും കെട്ടി നോക്കിനിൽക്കാനാകില്ല. ഇത് തുടർന്നാൽ നിയമ നിർമാണത്തിലേക്ക് പോകുമെന്നും ഇത്തരം നടപടികൾ തടയുന്നതിന് കെഎസ്ആർടിസിയെ അവശ്യ സർവീസ് ആയി പ്രഖ്യാപിക്കുന്നത് ആലോചിക്കുമെന്നും ഗതാഗത മന്ത്രി പറഞ്ഞു.