മാധ്യമപ്രവർത്തകയുടെ വീട് കയറി ആക്രമണം; തിരുവനന്തപുരം പ്രസ് ക്ലബ് സെക്രട്ടറി അറസ്റ്റിൽ

തിരുവനന്തപുരം പ്രസ് ക്ലബിലെത്തി പേട്ട പൊലീസാണ് എം.രാധാകൃഷ്ണനെ അറസ്റ്റ് ചെയ്തത്.

തിരുവനന്തപുരം: തിരുവനന്തപുരം പ്രസ് ക്ലബ് സെക്രട്ടറി എം. രാധാകൃഷ്ണനെ പൊലീസ് അറസ്റ്റു ചെയ്തു. സഹപ്രവർത്തകയെ വീട്ടിൽ കയറി ഭീഷണിപ്പെടുത്തിയെന്ന പരാതിയിലാണ് അറസ്റ്റ്. തിരുവനന്തപുരം പ്രസ് ക്ലബിലെത്തി പേട്ട പൊലീസാണ് എം. രാധാകൃഷ്ണനെ അറസ്റ്റ് ചെയ്തത്. സഹപ്രവർത്തകയുടെ വീട്ടില്‍ കയറി ആക്രമണം നടത്തി, സ്ത്രീത്വത്തെ അപമാനിക്കല്‍, മർദ്ദനം, തടഞ്ഞുവെയ്ക്കല്‍ തുടങ്ങിയ വകുപ്പുകളാണ് രാധാകൃഷ്ണന് എതിരെ ചുമത്തിയിരിക്കുന്നത്. രാധാകൃഷ്ണനെ പ്രസ്ക്ലബ് സെക്രട്ടറി സ്ഥാനത്ത് നിന്ന് പുറത്താക്കണമെന്ന് വനിതാ മാധ്യമപ്രവർത്തകരുടെ ആവശ്യം. നേരത്തെ വനിതാ മാധ്യമപ്രവർത്തക കൂട്ടായ്മയുടെ നേതൃത്വത്തില്‍ പ്രസ്ക്ലബ് ഉപരോധിച്ചിരുന്നു. രാവിലെ മുതല്‍ തുടങ്ങിയ ഉപരോധത്തിനൊടുവിലാണ് അറസ്റ്റുണ്ടായത്. സംഭവത്തില്‍ വനിതാകമ്മീഷന്‍ സ്വമേധയാ കേസെടുക്കുകയും കമ്മീഷണര്‍ അടക്കമുള്ളവരോട് റിപ്പോര്‍ട്ട് ആവശ്യപ്പെടുകയും ചെയ്തിരുന്നു.