തിരുവനന്തപുരം : നീറമൺകരയിൽ നടുറോഡിൽ സർക്കാർ ഉദ്യോഗസ്ഥനെ മർദിച്ച സംഭവത്തിൽ പ്രതികളെ 15 ദിവസത്തേയ്ക്ക് റിമാൻഡ് ചെയ്‌തു. കുഞ്ചാലുംമൂട് സ്വദേശികളായ അഷ്‌കർ, സഹോദരൻ അനീഷ് എന്നിവര്‍ക്കെതിരെയാണ് നടപടി. പ്രതികള്‍ക്കെതിരെ വധശ്രമം അടക്കമുള്ള ജാമ്യമില്ലാ വകുപ്പ് പ്രകാരമാണ് കേസെടുത്തിരിക്കുന്നത്.
മര്‍ദനമേറ്റ നെയ്യാറ്റിന്‍കര സ്വദേശി പ്രദീപ്, കരമന പൊലീസ് സ്റ്റേഷനിലെത്തി ഇവര്‍ സഞ്ചരിച്ചിരുന്ന വാഹനം തിരിച്ചറിഞ്ഞിരുന്നു. പ്രദീപ് അസഭ്യം പറഞ്ഞതാണ് മര്‍ദനത്തിലേയ്ക്ക് നയിച്ചതെന്ന് അനീഷിന്‍റെയും അഷ്‌കറിന്‍റെയും ബന്ധുക്കള്‍ ആരോപിച്ചു. എന്നാല്‍ പ്രദീപ് ഇക്കാര്യം നിഷേധിച്ചു.
നീറമണ്‍കരയില്‍ മർദനമേറ്റ സര്‍ക്കാര്‍ ഉദ്യോഗസ്ഥന്‍ പ്രദീപിന്‍റെ പ്രതികരണം
നവംബര്‍ 12ന് രാത്രിയാണ് പ്രതികളെ കരമന പൊലീസ് കസ്റ്റഡിയിലെടുത്തത്. തുടർന്ന് 13ന് രാവിലെ മജിസ്‌ട്രേറ്റിന് മുന്‍പില്‍ ഹാജരാക്കുകയും സംഭവ സ്ഥലത്തെത്തിച്ച് തെളിവെടുപ്പ് നടത്തുകയും ചെയ്‌തു