തിരുവനന്തപുരം :കേരളത്തിലേക്കുള്ള വിമാന നിരക്കുകൾ കുതിച്ചുയരുന്നതിൽ കേന്ദ്ര ഇടപെടൽ വേണമെന്ന് ആവശ്യപ്പെട്ട് വ്യോമയാന മന്ത്രി ജ്യോതിരാദിത്യ സിന്ധ്യക്ക് കത്തയച്ച് മുഖ്യമന്ത്രി. ഓണം സീസണിൽ പ്രവാസികൾ ധാരാളമായി കേരളത്തിലേക്ക് വരുന്ന സമയമാണ്. ആഘോഷങ്ങൾക്കായി നാട്ടിലെത്താനാഗ്രഹിക്കുന്ന പ്രവാസികൾക്കും മറ്റ് സംസ്ഥാനങ്ങളിലുള്ള മലയാളികൾക്കും കനത്ത ആഘാതമാണ് ഈ നിരക്ക് വർധനയെന്നും അതിനാൽ ഈ വിഷയത്തില്‍ അടിയന്തര ഇടപെടല്‍ വേണമെന്നും മുഖ്യമന്ത്രി ആവശ്യപ്പെട്ടു.
അന്ത്യമില്ലാത്ത പ്രതിസന്ധി: കുതിച്ചുയരുന്ന ഫ്ലൈറ്റ് നിരക്ക് കാരണം പലരും കേരളത്തിലേക്കുള്ള യാത്രകൾ മാറ്റിവയ്ക്കു‌ന്ന സാഹചര്യം വന്നിരിക്കുന്നു. ആവശ്യമെങ്കിൽ ഓഗസ്‌റ്റ് 15 മുതൽ സെപ്‌റ്റംബര്‍ 15 വരെയുള്ള ഒരു മാസം യുഎഇയിൽ നിന്ന് പ്രത്യേക ചാർട്ടേഡ് ഫ്ലൈറ്റ് ഏർപ്പെടുത്തണമെന്നും മുഖ്യമന്ത്രി അഭ്യർഥിച്ചു. ഉത്സവ, അവധിക്കാല സീസണുകളിലെ വിമാന ടിക്കറ്റ് വര്‍ധനവ് എല്ലാ കാലത്തും പ്രവാസികൾ ഉന്നയിക്കുന്ന പ്രശ്‌നമാണ്.
ഗൾഫ് മേഖലയിൽ നിന്ന് നാട്ടിലേയ്ക്ക് വരുന്ന സാധാരണക്കാരായ പ്രവാസികൾക്ക് വിമാന ടിക്കറ്റ് കുറഞ്ഞ നിരക്കിൽ ലഭ്യമാക്കാൻ നടപടി സ്വീകരിക്കുമെന്ന് സർക്കാർ നേരത്തേ തീരുമാനിച്ചിരുന്നു. ഇതിന്‍റെ ഭാഗമായി ബജറ്റിലും തുക വകയിരുത്തിയിരുന്നു. ഇതിന്‍റെ തുടർച്ചയെന്നോണം വിമാന കമ്പനികൾ ഉത്സവ, അവധിക്കാല സീസണുകളിൽ ഗൾഫ് രാജ്യങ്ങളിൽ നിന്നും കേരളത്തിലേയ്ക്ക് വരുന്ന വിമാനങ്ങളുടെ നിരക്ക് അമിതമായി ഈടാക്കുന്ന പ്രശ്‌നത്തില്‍ സംസ്ഥാനത്തിന് ഏതൊക്കെ തരത്തിൽ ഇടപെടാനാകും എന്നത് സംബന്ധിച്ച് വിലയിരുത്തുന്നതിനായി മുഖ്യമന്ത്രി പിണറായി വിജയന്‍റെ അധ്യക്ഷതയിൽ കഴിഞ്ഞ ദിവസം ഉന്നതതല അവലോകനയോഗവും ചേർന്നിരുന്നു.
ഇന്ത്യയിൽ നിന്നുള്ള വിമാന കമ്പനികളുടെ നിരക്കിനേക്കാൾ കുറവിൽ ഗൾഫിൽ നിന്നും ചാർട്ടേഡ് ഫ്ളൈറ്റുകൾ ലഭ്യമാണോ എന്നത് പരിശോധിക്കുന്നതിന്‍റെ ആദ്യപടിയായി വിമാന കമ്പനിയുമായി പ്രാഥമിക ചർച്ച നടത്താൻ യോഗത്തിൽ തീരുമാനമായിരുന്നു. വിമാന ടിക്കറ്റ് നിരക്ക് വർധനവ് പരിഹരിക്കണമെന്നും പ്രവാസികൾക്ക് നേരെ നടക്കുന്ന ചൂഷണം അവസാനിപ്പിക്കാൻ സർക്കാർ നടപടികൾ സ്വീകരിക്കണമെന്നും ആവശ്യപ്പെട്ട് വിവിധ പ്രവാസി സംഘടനകൾ ജനപ്രതിനിധികൾക്ക് നിവേദനം നൽകിയിട്ടുണ്ട്.
കുറഞ്ഞ നിരക്കില്‍ വിമാനയാത്ര വാഗ്‌ദാനം ചെയ്‌ത് പണം തട്ടല്‍ : ഇതിനിടെ കുറഞ്ഞ നിരക്കിൽ വിമാനയാത്ര വാഗ്‌ദാനം ചെയ്‌ത് 28 ലക്ഷം രൂപയോളം തട്ടിയെടുത്തെന്ന കേസിൽ മലപ്പുറം സ്വദേശി സുഹൈലിനെ പൊലീസ് അറസ്‌റ്റ് ചെയ്‌തിരുന്നു. 42000 രൂപയ്ക്ക് ടിക്കറ്റ് നൽകാമെന്ന് പറഞ്ഞ് ഗൾഫ് രാജ്യങ്ങളിൽ ജോലി ചെയ്യുന്ന 60 ഓളം മലയാളികളെയാണ് പ്രതി പറ്റിച്ചത്.