തിരുവനന്തപുരം: വിധിയെ ഒറ്റക്കാലുകൊണ്ട് സൈക്കിൾ ചവിട്ടി തോൽപ്പിക്കുന്ന ഇരുപതുകാരൻ. പേയാട് സ്വദേശിയായ ശ്യാംകുമാർ. മൂന്ന് വൃക്കകൾ, നടുവുമായി ചേർന്ന് ഒട്ടിയ നിലയിലുള്ള വലതുകാൽ ഇങ്ങനെയാണ് ശ്യം ജനിച്ചത്. എട്ടാം വയസിൽ വലതുകാൽ പൂർണമായും മുറിച്ചുമാറ്റി. വൃക്കകളുടെ പ്രവർത്തനം 23 ശതമാനം മാത്രമാണ്. എന്നാൽ ഇതൊന്നും ശ്യാമിനെ തളർത്തുന്നില്ല. മുറിച്ച കാലിന് പകരം കൃത്രിമ കാൽ വച്ച് ശ്യാം സൈക്കിൾ ചവിട്ടും. ഒന്നും രണ്ടും കിലോമീറ്റർ അല്ല. കുന്നും മലയും ഇടുങ്ങിയ വഴിയും ഒക്കെയായി ദിവസവും ഇരുപത് കിലോമീറ്ററോളം സഞ്ചാരം. കൃത്രിമ കാലുകൾ ഇടയ്ക്ക് പണി മുടക്കും. അപ്പോൾ സൈക്കിൾ ചവിട്ട് ഒറ്റക്കാലിലാക്കും.
കാലല്ല, മനസാണ് കരുത്ത്; സൈക്കിളിങിൽ താരമാകാൻ കൊതിച്ച് ഇരുപതുകാരൻ