തിരുവനന്തപുരം: സിസ്റ്റര്‍ അഭയ കൊല്ലപ്പെട്ട കേസിന്‍റെ വിചാരണയ്ക്കിടെ ഇന്നും സാക്ഷികള്‍ പ്രതികള്‍ക്കനുകൂലമായി കൂറുമാറി. ഇതോടെ അഭയ കേസ് വിചാരണയ്ക്കിടെ കൂറുമാറിയ സാക്ഷികളുടെ എണ്ണം ആറായി. കേസിലെ 53-ാം സാക്ഷി സിസ്റ്റര്‍ ആനി ജോണ്‍ ആണ് ഇന്ന് വിചാരണയ്ക്കിടെ ആദ്യം കൂറുമാറിയത്. സിസ്റ്റര്‍ അഭയ കൊല്ലപ്പെടുമ്പോള്‍ മദര്‍ സുപ്പീരിയറായിരുന്നു സിസ്റ്റര്‍ ആനി ജോണ്‍.
കോട്ടയം പയസ് ടെന്‍ത് കോണ്‍വെന്‍റില്‍ സിസ്റ്റര്‍ അഭയയെ കാണാനില്ലെന്ന വിവരം അറിഞ്ഞ് താന്‍ അവിടെ എത്തി. ആ സമയം സിസ്റ്റര്‍ അഭയ താമസിച്ചിരുന്ന കോണ്‍വെന്‍റിലെ വാതിലിനു സമീപം ചെരുപ്പുകളും മഴുവും കണ്ടുവെന്ന് സിസ്റ്റര്‍ ആനി ജോണ്‍ 1993 സിഡംബര്‍ 21ന് സിബിഐക്ക് മൊഴി നല്‍കിയിരുന്നു. എന്നാല്‍ ഇക്കാര്യം താന്‍ ഓര്‍ക്കുന്നില്ലെന്ന് ഇന്ന് നടന്ന വിചാരണയില്‍ സിസ്റ്റര്‍ ആനി ജോണ്‍ പറഞ്ഞു.