തിരുവനന്തപുരം:വിനോദയാത്ര കഴിഞ്ഞെത്തിയ സ്‌കൂൾ സംഘത്തെ രാത്രിയിൽ നഗരമധ്യത്തിൽ തടഞ്ഞുനിർത്തിയ സംഘത്തിനെതിരെ പൊലീസ് നടപടിയെടുക്കും. അധ്യാപകരും രക്ഷിതാക്കളും നൽകിയ പരാതിയുടെ അടിസ്ഥാനത്തിൽ ഇവരോട് ഇന്ന് ഫോർട്ട് സ്റ്റേഷനിൽ ഹാജരാകാൻ പൊലീസ് നിർദേശിച്ചു. മാധ്യമ വാർത്തകളുടെ അടിസ്ഥാനത്തിലാണ് പൊലീസ് നടപടി വേഗത്തിൽ നീക്കുന്നത്.
ഫോർട്ട് ഗേൾസ് മിഷൻ എച്ച്‌എസ്എസില്‍ നിന്നും കോട്ടയത്തേക്ക് ടൂർ പോയി മടങ്ങിയെത്തിയ സംഘത്തെയാണ് ഓൺലൈൻ മാധ്യമ പ്രവർത്തകരെന്ന് അവകാശപ്പെട്ടെത്തിയ സംഘം തമ്പാനൂർ ഓവർ ബ്രിഡ്‌ജിനു സമീപം തടഞ്ഞു നിർത്തി ശല്യം ചെയ്‌തത്. ബസ് അമിത വേഗത്തിലായിരുന്നുവെന്നും പൊലീസിൽ അറിയിക്കുമെന്നും ഭീഷണിപ്പെടുത്തിയായിരുന്നു സംഘം ബസ് തടഞ്ഞ് കുട്ടികളെയും അധ്യാപകരെയും രക്ഷിതാക്കളെയും തടഞ്ഞുവച്ചത്. എന്നാൽ സംഘം ദീർഘദൂരം തങ്ങളെ പിന്തുടർന്നു ശല്യം ചെയ്യുകയായിരുന്നുവെന്ന് അധ്യാപകരും കുട്ടികളും പറഞ്ഞു.