തിരുവനന്തപുരം:മാനസിക പ്രയാസങ്ങളെ തുടര്‍ന്ന് കൗണ്‍സിലിങ്ങിനെത്തിയ 13കാരനെ ലൈംഗിക പീഡനത്തിനിരയാക്കിയ കേസില്‍ ക്ലിനിക്കല്‍ സൈക്കോളജിസ്റ്റ് ഡോ. കെ ഗിരീഷ് (59) കുറ്റക്കാരനാണെന്ന് തിരുവനന്തപുരം പ്രത്യേക അതിവേഗ കോടതി ജഡ്‌ജ് ആജ് സുദര്‍ശന്‍. കോടതിയില്‍ ഹാജരാക്കി റിമാന്‍ഡ് ചെയ്‌ത പ്രതിക്ക് വ്യാഴാഴ്‌ച ശിക്ഷ വിധിക്കും. നേരത്തെ മറ്റൊരു ആണ്‍കുട്ടിയെ പീഡനത്തിന് ഇരയാക്കിയ കേസില്‍ ഇയാളെ ആറ് വര്‍ഷം കോടതി കഠിന തടവിന് ശിക്ഷിച്ചിരുന്നു.
ഈ കേസില്‍ ഹൈക്കോടതിയില്‍ നിന്ന് ജാമ്യം ലഭിച്ചതിന് പിന്നാലെയാണ് വീണ്ടും പീഡന കേസില്‍ അറസ്റ്റിലായത്. 2015 ഡിസംബര്‍ ആറ് മുതല്‍ 2017 ഫെബ്രുവരി 21 വരെ ക്ലിനിക്കില്‍ കൗണ്‍സിലിങ്ങിനെത്തിയപ്പോഴാണ് കുട്ടി പീഡനത്തിന് ഇരയായത്. ആരോഗ്യ വകുപ്പിൽ അസിസ്റ്റന്‍റ് പ്രൊഫസറായിരുന്ന പ്രതി മണക്കാട് കുര്യാത്തിയിൽ വീടിനോട് ചേർന്ന സ്വകാര്യ സ്ഥാപനമായ (ദേ പ്രാക്‌സിസ് പ്രാക്‌ടീസ് ടു പെർഫോം) എന്ന സ്വകാര്യ ക്ലിനിക്കിൽ വച്ചാണ് കുട്ടിയെ പീഡിപ്പിച്ചത്.