തിരുവനന്തപുരം: ഇത് ബാഷ. തിരുവനന്തപുരം വെങ്ങാനൂർ സ്വദേശി ഷെരീഫ് എം ജോർജിൻ്റെ മുളമൂട്ടിൽ വീട്ടിലെ ഗ്രേറ്റ് ഡെയ്ൻ ഇനത്തിൽപ്പെട്ട വളർത്തുനായ. ശക്തവും കുതിച്ചുയരുന്നതുമായ രൂപമുള്ള, ഉയരം കുറഞ്ഞ മുടിയുള്ള ഇനം. ഗാംഭീര്യമായ ശബ്‌ദം. ബാഷയ്‌ക്ക് ഒരു പൂർവകാലമുണ്ട്.
ഒരു വർഷം മുൻപ്, കൃത്യമായി പറഞ്ഞാൽ 2021 ഡിസംബർ 18ന് കഴക്കൂട്ടം - കോവളം ബൈപ്പാസ് റോഡിലെ കല്ലുവെട്ടാൻ കുഴിയിൽ വൈദ്യുത പോസ്റ്റിൽ കെട്ടിയിട്ട് ഉടമസ്ഥൻ പോകുമ്പോൾ ദയനീയമായിരുന്നു ബാഷയുടെ അവസ്ഥ. ആഹാരമില്ലാതെ ശരീരം ഒട്ടി എല്ലുകൾ പുറത്തേക്കുന്തിയ നിലയിലാണ് ഷെരീഫ് ബാഷയെ കാണുന്നത്. രണ്ടാമതൊന്ന് ചിന്തിക്കാതെ ഒപ്പം കൂട്ടി.
മൃഗഡോക്‌ടർമാരുടെ അഭിപ്രായം തേടി ചികിത്സയും മരുന്നും നൽകി. പതിയെ ആഹാരം കഴിച്ചു തുടങ്ങി. പ്രോട്ടീൻ കലർന്ന ആഹാരം നൽകി ആരോഗ്യം വീണ്ടെടുത്തു. ഇന്നവൻ പൂർണ ആരോഗ്യവാനാണ്. ഷെരീഫ് തന്നെയാണ് നായക്ക് ബാഷ എന്ന പേരിട്ടതും.